भांगरभूंय | प्रतिनिधी
काणकोण: काणकोणां बांदतल्या रवींद्र भवन बांदकामाची पळोवणी काल (बुधवारा) कला आनी संस्कृती मंत्री गोविंद गावडे हांणी केली. जाल्यार तांचे फाटोफाट काणकोणचे आमदार आनी सभापती रमेश तवडकार हांणी पळोवणी केली. गोविंद गावडे हांणी रवींद्र भवनाचें काम ऑगस्ट मेरेन पुराय जातलें अशें सांगलें. जाल्यार सभापती रमेश तवडकार हांणी सप्टेंबर ते ऑक्टोबर मेरेन काम पुराय जातलें अशें सांगलें.
2019 वर्सा रवींद्र भवन प्रकल्पाचें काम पुराय जावंक जाय आशिल्लें. पूण 2023 वर्स लागलें म्हणल्यार पांच वर्सां चड लागून लेगीत हें काम पुराय जावंक शकलें ना. 2012 वर्सा ह्या प्रकल्पाच्या बांदकामाक सुरवात जाल्ली. मदेकांत कोरोनाचो काळ आयिल्ल्यान दोन वर्सां काम कांसवा गतीन सुरू आशिल्लें.
काल जीएसआयडीसीच्या अधिकाऱ्यांक मंत्री गावडे हांणी ऑगस्ट मेरेन काम पुराय करपाच्यो सुचोवण्यो दिल्यो. मंत्री गावडे येवन गेले उपरांत काणकोणचे आमदार आनी सभापती रमेश तवडकार हांणी प्रकल्पाक भेट दिली. त्या वेळार पत्रकारां कडेन उलयतना तांणी सप्टेंबर ते ऑक्टोबर मेरेन काम पुराय जातलें अशें सांगलें.
रवींद्र भवनाच्या बांदकामा खातीर आयिल्ले कामगार आनी सायटीर देखरेख पळोवपी अभियंत्या मदीं झगडीं जाल्ल्यान प्रकल्पाचें काम सद्या बंद आसा. ताचेर उपाय काडपा खातीर काल कामगार मुखेली आनी सायट अभियंत्याची जोड बसका साधन सुविधा विकास म्हामंडळाच्या अधिकाऱ्यांनी घेतली आनी तांचे मदीं समेट घडोवन हाडलो. ह्या वेळार सभापती रमेश तवडकार, कला आनी संस्कृती संचालनालयाचे संचालक सगुण वेळीप, साधन सुविधा विकास म्हामंडळाचे अधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
