भांगरभूंय | प्रतिनिधी
काणकोण, प्रतिनिधी: पासल अर्धफोंड, काणकोणाच्या दोगा भावांक आयतारा रातीं काळजाच्या आताकान मरण आयलें. तांच्या कुटुंबाक वांगडाच व्हडलो आनी धाकट्या भावाचें मरण पळोवचें पडलें. लक्ष्मीकांत जना नायक (४८) आनी शशिकांत जना नायक (४६) अशीं तांचीं नांवां.
काणकोणा रूबी रेसीडेंसी इमारत अपघात घडिल्लो तेन्नाय एकाच घरांतल्या दोगांक मरण आयिल्लें. आयजूय काणकोणकारांक एकाच घरांतल्या दोग भावांक मरण आयिल्ल्याचें दुख्ख जालें. सभापती रमेश तवडकार हांच्या कार्यालयांत क्लार्क म्हणून काम करपी शैला हांचे ते भाव. ते दोगूय १ जुलयाक जल्मल्ले देखून तांचो वाडदिसूय वांगडाच मनयताले. आयतारा दोगांयकूय मरणूय एकाच दिसा आयलें.
चड म्हायती प्रमाण, शशिकांत नायक हो सदां भशेन जेवन न्हिदिल्लो. रातची ताका संडासाक वचपाची संवय आशिल्ली. सदां भशेन तो उठूंक नाशिल्ल्यान लक्ष्मीकांत नायक ताका पळोवपाक ताचे कुडींत गेलो. शशिकांत कांयच हालचाल करिना ते पळोवन लक्ष्मीकांत हांणी भयण आनी मदल्या भावाक उलो मारलो. तो उलो लक्ष्मीकांताचो निमाणो थारलो. त्या दोगांयकूय पळोवन शैलेश आनी शैला हांणी शेजारच्या महेश नायक हांकां आपयलो. पूण लक्ष्मीकांत हांकां मरण आयिल्लें.
एकाच घरांतल्या दोगा भावांक मरण आयिल्ल्याचें कळटांच तांकां निमाणो निरोप दिवपा खातीर लोकांनी गर्दी केल्ली. आयज दनपरां तांचे कुडीचेर निमणे संस्कार जाले. दोन वर्सां पयलीं तांचे आईक मरण आयिल्लें. तशेंच १३ वर्सां पयलीं बापायक मरण आयिल्लें. तांचे फाटल्यान भयण शैला आनी भाव शैलेश असो परिवार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
