भांगरभूंय | प्रतिनिधी
काणकोण, पैंगीण मेळून 165 चौ. मिटर लांबायेचो घालतले माटोव
काणकोण: गोंयच्या बाराय म्हालांनी चवथी निमतान मोटोळीच्या सामाना खातीर बाजार भारपाचे आसात. ह्या बाजारांचो माटोव घालपाचें काम झुजा पांवड्यार सुरू जालां. काणकोणां चावडेर कदंब बस स्टॅण्डार जाल्यार दुसरो माटोव पैंगीणी श्रद्धानंद विद्यालया कुशीक घालतले. चावडे वयलो माटोव 90 चौ. मिटर लांबायेचो जाल्यार पैंगीणीचो माटोव 75 चौ. मिटर लांबायेचो आसा. ह्या दोनूय माटवांचेर पत्रे घालतले. दोगांचीय लांबाय 165 चौ. मिटर जातली. ताका 13 लाख रुपया खर्च येतलो. ह्या खर्चाचो दर भौशीक बांदकाम खात्यान निश्चीत केल्ल्याची म्हायती खात्रेच्या गोपां कडल्यान मेळ्ळ्या. मजगतीं, ह्या माटोळीच्या बाजारा खातीर 35 आपमजत गटाची नोंदणी केल्या.
हे दोनूय माटोव 20 ते 31 ऑगस्ट मेरेन सुरू आसतले. 11 दिसांच्या ह्या माटवां खातीर एका काणकाेण म्हालांतूच 13 लाख रुपया खर्च येत आशिल्ल्यान हेर 11 म्हालांतलो खर्च कोट्यांनी रुपयांच्या घरांत वचपाची शक्यताय आसा. ह्या 13 लाखाच्या खर्चांत कोणा एका गरिबाचें घर तयार जातलें आसलें अशें काणकोण पालिकेच्या एका नगरसेवकान आपली प्रतिक्रिया उक्तायतना सांगलें.
सरकारान मोटोळीचो बाजार भरोवप ही बरी गजाल. पूण करदात्याच्याच्या पयशांतल्यान अशे तरेची उधळपट्टी करप हें कितले मेरेन योग्य आसा असो प्रस्न लेगीत ह्या नगरसेवकान उपस्थीत केलो.
मजगतीं, काणकोणचे एक नामनेचे माटवांचे डेकोरेशन करपी मेघनाथ बांदेकार हांकां विचारलें तेन्ना पुराय माटोव पत्र्याचो घालपाचो आशिल्ल्यान म्हजे कडेन फावो तितले पत्रे नाशिल्ल्यान हांवें तातूंत लक्ष घालें ना अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
