भांगरभूंय | प्रतिनिधी
जैव विवीधतायेचें व्हड प्रमाणांत लुकसाण
काणकोण: काल सांजवेळा चापोली हांगासरल्या कर्पा दोंगराक उजो लागलो. उजो लागपाचें कारण समजूंक शकलें ना तरी जैव विविधतायेचें व्हड प्रमाणांत लुकसाण जाल्ल्याची खबर आसा. रान रक्षक आनी उजो पालोवपी दळाचे जवान उज्याचेर नियंत्रण दवरपा खातीर खर यत्न करतात. काळोख आनी उजो पातळत आशिल्ल्यान तांकां उज्याचेर नियंत्रण दवरपाक कठीण जालां.
काल दनपारां खाट्यार उजो लागिल्लो. उपरांत गुळे हांगासरल्या माळ रानाक आनी सांजवेळा 6.30 वरांच्या सुमाराक चापोलीतल्या कर्पा दोंगराक उजो लागलो. गुळें हांगा कोंकण रेल्वेच्या ट्रॅका वटेन आशिल्ल्या बोगद्या कुशीक उदक सांठून उरत आशिल्ल्यान रानवटी जनावरां थंय उदक पियेवपा खातीर येतात. तांकां ह्या उज्याचो झळ बसपाची शक्यताय उक्तायतात.
उजो लागिल्ल्याची म्हायती मेळटकूच श्रीस्थळ जैव विवीधताय समितीचे अध्यक्ष विनय तुबकी, तेजस नायक गांवकार, दामोदर च्यारी, शिरीष पै, उजो लागिल्ले सुवातेर धांवून गेले. उजो लागिल्ल्याची खबर मेळटकूच जनार्दन भंडारी, विकास भगत लेगीत घडणूक थळार पावले. फाटल्या 20 दिसां पयलीं ह्याच दोंगराक उजो लागिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
