भांगरभूंय | प्रतिनिधी
म्हापशें: डिमेलोवाडो, काणका हांगा 25 वर्सां पिरायेच्या अनवळख्या मनोरुग्णान रस्त्या शेजरा पार्क केल्ल्यो धा दुचाकींक दांड्यान फोडल्यो. हातूंत सगल्या वाहनांचे मेळून 1 लाखांचें लुकसाण जालें. ह्या प्रकरणांत म्हापशें पुलिसांनी ताकतिकेन घडणूक थळार धांव घेवन ह्या दुबावीत मनोरुग्णाक ताब्यांत घेतला.
पुलिसां कडल्यान मेळिल्ले म्हायती प्रमाण ही घडणूक शुक्रारा सांजवेळा 5 वरां मजगतीं घडली, डिमेलोवाड्यार सरकारी शाळे कुशीक रस्त्याचे कुशीक थंयच्या लोकांनी आपल्यो दुचाकी पार्क करून दवरिल्ल्यो. ह्या दुचाकींचेर अचकीतपणान सदर मनोरुग्ण तरणाट्यान हल्लो करून आनी दांड्यान वाहनांचे लुकसाण करपाक सुरवात केली. सगल्याच दुचाकींचो दर्शनी भाग ताणें फोडलो. ह्या वेळार एका दुचाकीर बशिल्लो एक तरणाटे किरकोळ जखमी जालो.
घडणुकेची म्हायती मेळटकूच पुलीस उपनिरिक्षक गौरव नायक आनी सहकारी पुलिसांनी घडणूक थळार धांव घेतली आनी दुबावीत मनोरुग्णाक ताब्यांत घेवन पुलीस स्टेशनार हाडले. उपरांत त्या बांबोळे मनोरुग्ण हॉस्पिटलांत दाखल केलो. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
