भांगरभूंय | प्रतिनिधी
मतदारांचो विस्वासघात करचो ना: एल्टन डिकॉस्टा
केपें: केपेंचे आमदार एल्टन डिकॉस्टा हांणी काँग्रेसीच्या आठ आमदारां बरोबर भाजपांत प्रवेश केलो ना. तशेंच केपेंकारांचो विस्वासघातूय केलो ना. काँग्रेस पक्षा बरोबर ते प्रामाणीक रावले हे फाटभुंयेर केपें काँग्रेस ब्लॉक अध्यक्ष अवधूत आमोणकार आनी नगरपालिका वाठारांतल्या लोकांनी एकठांय येवन तांचे अभिनंदन करपा खातीर खासा कार्यावळीचें आयोजन केलें. हे कार्यावळीक लोकांनी व्हड प्रमाणांत हाजेरी लायली.
हे कार्यावळींत दक्षीण गोंय काँग्रेस समितीचे अध्यक्ष सावियो डिसिल्वा, बाळ्ळी पंचायतीचे सरपंच गोविंद फळदेसाय, पंच महेंद्र गांवकार, बेतूल पंचायतीचे उपसरपंच किशोर नायक, पंच डोमास्को डिसिल्वा, केपें नगरपालिकेची नगरसेविका अर्लिंडा लासार्डे, जॉकिना फर्नांडीस, नगरसेवक लॉर्डेस फर्नांडीस हाजीर आशिल्ले.
ह्या वेळार आमदार डिकॉस्टान म्हणलें, म्हाका लोकशायेचें म्हत्व खबर आसा. लोकांचो आवाज चिड्डून कांयच उपेग जावचो ना. म्हाका केपेंकारांनी व्हड मतांनी वेंचून हाडला. ज्या मतदारांचो आदल्या आमदारान केपेंच्या विकासाच्या नांवा खाला विस्वासघात केलो तोच मार्ग आपणे आपणायिल्लो जाल्यार मतदारांक कसलेंच म्हत्व उरचें नाशिल्लें. आमी लोकशायेक आदारान पळोवंक जाय आनी ताका पाळो दिवंक जाय.
केपेंचो आमदार ह्या नात्यान हांव केपेंच्या लोकांक सदांच विस्वासांत घेवन कामां करतलों. लोकांच्या विरोधांत वचून कसलेंच काम करचो ना. म्हजेर जे पद्दतीन केपेंच्या लोकांनी आयज मेरेन विस्वास दवरला तो सदांच दवरचो. म्हाका केप्यां कसलेंच तरेचें राजकारण नाका. केपेंच्या लोकांची उदरगत जाय होच म्हजो हेतू आसा अशें एल्टन डिकॉस्टान म्हणलें.
मुख्यमंत्री डॉ. प्रमोद सावंत हांणी केपेंचो विकास जावचो हे खातीर म्हाका सदांच सहकार्य केलां. ताका लागून आयज केपेंची खूबशीं कामां चालीक लागल्यांत. मुख्यमंत्री आमचीं कामां केन्नाच आडावन दवरचो ना. कारण तांकां केपेंची परिस्थिती खबर आसा अशें आमदार डिकॉस्टान मुखार उलयतना म्हणलें.
तरणाट्यांक रोजगार मेळचो हे खातीर म्हजे पयलीं सावन यत्न चालूच आशिल्ले. ते खातीर हांवें विचार लेगीत केला. दरेकाक सरकारी नोकऱ्यो हांव दिवंक शकना. ताका लागून खाजगी कंपनींनी तरणाट्यांक नोकऱ्यो मेळोवन दितलों. तशेंच पर्यावरणाक लुकसाण न दिवपी प्रकल्प हाडून केपेंच्या तरणाट्यांचो रोजगारीचो प्रस्न सोडयतलों अशें आमदार एल्टन डिकॉस्टान म्हणलें.
ह्या वेळार आमदार डिकॉस्टा हांच्या निर्णयाचें अभिनंदन करपा खातीर दक्षीण गोंय काँग्रेस समितीचे अध्यक्ष सावियो डिसिल्वा, बाळ्ळी पंचायतीचे सरपंच गोविंद फळदेसाय, पंच डोमास्को डिसिल्वा आनी हेरांचीं उलोवपां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
