भांगरभूंय | प्रतिनिधी
कुडटरे भाजपा कार्यकर्त्यां सयत कार्यावळीक लायली हाजेरी
मडगांव: प्रधामंत्री नरेंद्र मोदी सर्वसामान्य लोकां कडेन थेट संवाद सादत आशिल्ल्याची गजाल ही सर्वसामान्य ना. राजकारण कुशीक दवरून देशाच्या, राज्याच्या विकासाचेर उलोवपाची आनी कार्य करपाची वेळ आयल्या. हाची जाण प्रधानमंत्री नरेंद्र मोदी हांच्या ‘मन की बात’ कार्यावळींतल्यान जाली. ही कार्यावळ काँग्रेसींत आशिल्लों तेन्नाय पळयतालों अशी प्रतिक्रिया नुवेंचे आमदार आलेक्स सिक्वेरा हांणी दिली.
कुडटरी मनोरा राय हांगासरल्या बूथ क्रमांक धाचेर प्रधानमंत्री मोदी हांची 100 वी ‘मन की बात’ पळोवपाची कार्यावळ आयोजीत केल्ली. हे कार्यावळीक आमदार आलेक्स सिक्वेरा, भाजपाचे एसटी फुडारी अँथनी बार्बोझा हाजीर आशिल्ले.
आमदार सिक्वेरा हांणी सांगलें की ‘मन की बात’ ही कार्यावळ खूब बरी आसा. सर्वसामान्य लोकांच्यो संकल्पना, विचार प्रधानमंत्र्या कडेन मांडप हें ह्या कार्यावळींतल्यान जाता. हें आतांच जाता अशें ना, जाल्यार दरेक कार्यावळींत खूबशा लोकांच्या कामांची म्हायती दितात. परिस्थिती खंयचीय आसूं फाटीं पळयनासतना मुखार वचत रावपाचो सल्लो योग्य आशिल्ल्याचें तांणी म्हणालें. लोकांचे प्रगतीचेर, लोकांच्यो संकल्पना प्रधानमंत्र मोदी हांणी जाणून घेवेन भाश्य केलें. तशेंच काँग्रेसींत आसतना लेगीत प्रधानमंत्र्यांची ही कार्यावळ पळयतालों. प्रधानमंत्री हे खंयच्याच पक्षाचे नासतात. तांचे विचार सगल्यांनी आयकूंक कांयच हरकत नाशिल्ल्यान चर्चील आलेमांव हांणी लेगीत कार्यावळींत वांटो घेतिल्लो आसुये अशें तांणी म्हणलें.
अँथनी बार्बोझा हांणी सांगलें की कुडटरींतल्या बुथार प्रधानमंत्री मोदी हांची ‘मन की बात’ कार्यावळ आयोजीत केल्ली. हे कार्यावळींत नुवेंचे आमदार आलेक्स सिक्वेरा हांचे सयत ह्या प्रभागांतले कार्यकर्ते हाजीर आशिल्ले. राय हांगासरले चर्चींत कार्यावळ आसून लेगीत हे कार्यावळी खातीर व्हड संख्येन कार्यकर्ते हाजीर आशिल्ले. सबका साथ, सबका विकास, सबका प्रयास ह्या विचारांनी भाजपाचे कार्यकर्ते कार्य करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
