भांगरभूंय | प्रतिनिधी
म्हापशें: कळंगूट पंचायतीन येरादारी पुलिसांच्या आदारान गांवांतले फुटपाथ आनी रस्ते आडायिल्ल्या बेवारशी वाहनांचेर कारवाय करून हीं वाहनां जप्त केलीं. हे कारवाये खाला सुमार 21 वाहनां जप्त केल्यांत.
मंगळारा सरपंच जोजफ सिक्वेरा हांच्या फुडारपणा खाला पंचायतीच्या पंगडान कळंगूट येरादारी पुलिसांचे मजतीन ही मोहीम राबोवन वाहनां जप्त केलीं. ह्या वेळार येरादारी पुलीस निरिक्षक सचीन नार्वेंकार आनी पुलीस कर्मचारी हाजीर आशिल्ले.
पंचायत वाठारांतल्या रस्त्यांचेर कितलेशेच म्हयने बेवारशी स्थितींत पडून आशिल्ल्या वाहनांचेर जप्तीची कारवाय कळंगूट पंचायतीन सुरू केल्या. हाचे पयलीं पंचायतीन संबंदीत वाहनांच्या धनयांक वाहनां काडपाची सुचोवणी केल्ली.
पूण हाचे कडेन संबंदीत वाहन धनयांनी आडनदर केल्ल्यान ही जप्तीची कारवाय हातांत घेवन पंचायतीन 15 दुचाकी आनी 6 चारचाकी मेळून 21 वाहनां जप्त केलीं.
हे मोहिमे विशीं उलयतना सरपंच जोजफ सिक्वेरान म्हणलें, गांवचें विद्रुपीकरण करपी एकूय बेवारशी स्थितींतलें वाहन रस्त्यार आमी पार्क करूंन दिवचे नात. ह्या बेवारशी वाहनांक लागून येरादारीक आडमेळीं येतात. पंचायतीन येरादारी पुलिसांच्या आदारान नो पार्कींग आनी फुटपाथार पार्क केल्लीं वाहनां चप्त केल्यांत. लोकांनी आपलीं वाहनां अशे तरेन रस्त्यार दवरची न्हय. हातूंतलें एक वाहन फाटलीं तीन वर्सां अशेंच पडून आशिल्लें. तें लेगीत जप्त केलां.
जप्त केल्ल्या वाहनांच्या धनयांक नोटिसी धाडून दंड आकारतले. ज्या वाहनांचे धनी वाहनां सोडोवपा खातीर पंचायती कडेन येवचे नात, अशा वाहनांची म्हायती येरादारी खात्याक दितले. तशेंच नेमां प्रमाण भौशीक जायरात जारी करून ह्या वाहनांची पावणी करतले, अशी म्हायती सरपंच जोजफ सिक्वेरान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
