भांगरभूंय | प्रतिनिधी
म्हापशें: कळंगूट पुलिसांनी घुंवळे वखदां विरोधी कारवाये खाला नायकावाड्यार धाड घालून दुबावीत गांती मध्याप गणेश (24, ओडिशा) ह्या तरणाट्याक अटक केली. ताचे कडल्यान पुलिसांनी 3.15 लाखांचो 3 कील 150 ग्राम गांजो जप्त केलो.
ही कारवाय पुलिसांनी बिरेस्तारा दनपारां केली. नायकावाडो कळंगूटे आना लुसींदा ह्या व्हिला कुशीक घुंवळे वखदांचो विक्री वेव्हार जावपाचो आशिल्ल्याची म्हायती पुलिसांक खात्रेच्या गोपां कडल्यान मेळिल्ली.
ते प्रमाण पुलीस पंगडान सांपळो रचलो. दुबावीत आरोपी थंय आयलो तेन्ना पुलिसांनी ताका धरलो आनी ताची झडटी घेतली तेन्ना ताचे कडेन आशिल्ल्या बॅगांत वयलीं घुंवळे वखदां सांपडलीं. ताचें मोल 3 लाख 15 हजार रुपया आसा.
पुलीस उपअधिक्षक विश्वेश कर्पे आनी निरिक्षक दत्तगुरू सावंत हांच्या मार्गदर्शना खाला निरिक्षक किशोर रामानन, उपनिरिक्षक किरण नायक, हवालदार विद्यानंद आमोणकार, अमीर गरड, विजय नायक, आकाश नायक आनी गणपत तिळोजी ह्या पंगडान केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
