भांगरभूंय | प्रतिनिधी
पर्यटन खात्यान 80 हजारांचो दंड केलो वसूल
म्हापशें: कळंगूट पुलिसांनी 16 टावट्स दलालांक धरले आनी अटक केली. ह्या सगल्या दुबावितांचेर पर्यटन खात्या कडल्यान दंडात्मक कारवाये खाला 80 हजारांचो दंड वसूल करून तांकां समज दिवन सुटका केली.
पुलीस निरिक्षक परेश नायक हांच्या फुडारपणा खाला पुलिसांनी बुधवारा टावट्स दलाला आड खासा मोहीम राबयली. हे मोहिमेच्या माध्यमांतल्यान वेगळ्यावेगळ्या वाठारांनी पर्यटकांची सतावणूक करपी 16 जाणांक ताब्यांत घेतले आनी दुबावितां आड गोंय पर्यटन कायद्या प्रमाण गुन्यांव नोंद केलो.
उपरांत दुबावितांक पर्यटन संचालनालया मुखार हजर केले. पर्यटन खात्यान दुबावितांक समज दिली. तशेंच कायद्या प्रमाण सगल्या दुबावितांचेर दरेकी 5 हजार रुपया प्रमाण दंडाची रक्कम वसूल केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
