भांगरभूंय | प्रतिनिधी
म्हापशें: नायकावाडो कळंगूटे पुलिसांनी लक्की ईकोमेय (40) ह्या नायजेरियन नागरिकाक अटक केली आनी ताचे कडल्यान 1 लाख 40 हजारांचो एमडीएमए हो ड्रग्स जप्त केलो.
कळंगूटचे पुलीस निरिक्षक दत्तगुरू सावंत हांच्या मार्गदर्शना खाला उपनिरिक्षक किरण नायक, प्रगती मळीक, हवालदार विद्याधर आमोणकार, कॉन्स्टेबल अमीर गरड, गणपत तिळोजी, आकाश नायक, भगवान पालयेंकार, गौरव नायक आनी संज्योत केरकार ह्या पंगडान ही कारवाय बुधवारा मध्यान रातीं 2 वरांच्या सुमाराक केली.
डॉल्फीन सर्कला कुशीक घुंवळे वखदां विक्रीचो वेव्हार जावपाचो आशिल्ल्याची म्हायती पुलिसांक मेळिल्ली. ते प्रमाण पुलीस पंगडान सांपळो रचून दुबावीत आरोपीक धरलो.
झडटे वेळार ताचे कडेन 14 ग्राम एमडीएमए सांपडलें. ह्या घुंवळे वखदाचें मोल 1 लाख 40 हजार रुपया मार्केटांत आसा.
मजगतीं, हाचे पयलीं दुबावीत लक्की ईकोमेय हाका हणजूण पुलीस आनी गुन्यांव फांट्यान ड्रग्स प्रकरणांत अटक केल्ली. सद्या तो जामिनाचेर सुटिल्लो. फुडलो तपास कळंगूट पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
