कळंगूटे जुगार अड्ड्याचेर धाड

भांगरभूंय | प्रतिनिधी

5 तरणाट्यांक अटक; गुन्यांव फांट्याची कारवाय

पणजी: गोंय पुलिसांच्या गुन्यांव फांट्यान कळंगूटे एका फ्लॅटांत सुरू आशिल्ल्या जुगार अड्ड्याचेर धाड घालून अमन अग्रवाल, राकेश कुमार नाशानी, सागर भागवाणी, विशाल कुमार दोडवाणी आनी करन पखानी ह्या छत्तीसगड हांगासरल्या पांच तरणाट्यांक अटक केल्या. तांचे कडल्यान रोख रक्कम आनी हेर जुगार साहित्य मेळून 1 लाख 20 हजार रुपया मोलाचें साहित्य जप्त केलां.

कळंगूटे अ‍ॅनेट बीच अपार्टमेंटाच्या एका फ्लॅटांत जुगार सुरू आशिल्ल्याची म्हायती गुप्तहेरांनी गुन्यांव फांट्याच्या एका अधिकाऱ्याक दिल्ली. ते प्रमाण पुलीस अधिक्षक निधीन वाल्सन आनी अधिक्षक राजू रावत देसाय हांच्या मार्गदर्शना खाला पुलीस निरिक्षक दिनेश गडेकार, उपनिरिक्षक गिरीश पाडलोस्कार, हवालदार अशोक गावडे, ईश्वर कासकार, कॉन्स्टेबल विनायक सावंत, कल्पेश तोरस्कार, रुपेश गायकवाड आनी हेरांनी मंगळारा मध्यान रातीं धाड घाली.

त्या वेळार गुन्यांव फांट्यान छत्तीसगड हांगासरल्या अमन अग्रवाल, राकेश कुमार नाशानी, सागर भागवाणी, विशाल कुमार दोडवाणी आनी करन पखानी ह्या पांच तरणाट्यांक ताब्यांत घेतले. त्या वेळार तांचे कडल्यान 3,200 रुपया रोख, लॅपटॉप, मोबायल आनी हेर जुगाराचें साहित्य मेळून 1 लाख 20 हजार रुपया मोलाचें साहित्य जप्त केलें.

गुन्यांव फांट्याचे पुलीस उपनिरिक्षक गिरीश पाडलोस्कारान सगल्या पांचूय दुबावितां आड गोंय भौशीक जुगार कायद्याचें कलम 3 आनी 4 खाला गुन्यांव दाखल करून अटक केली. उपरांत दुबावितांची दरेकी 10 हजार रुपयांच्या वैयक्तीक हमीचेर सुटका केली.