भांगरभूंय | प्रतिनिधी
कांदोळे सुपर मार्केटांतली घडणूक; 7 जाणांक अटक
पणजी: कांदोळे एका सुपर मार्केटांत तिगां बायलां कर्मचाऱ्यांनी सोयऱ्यांचे मजतीन 7.55 लाख रुपयांची तोपी घालपाचें प्रकरण मुखार आयलां. वेवस्थापनाक सुपर मार्केटांत नेमान येवपी एका गिरायकाचे खरेदीचेर दुबाव आयले उपरांत वयलें प्रकरण मुखार आयलें. ह्या प्रकरणांत कळंगूट पुलिसांनी तीन बायल कर्मचाऱ्यां सयत तांच्या चार सोयऱ्यांक मेळून सात जाणांक अटक केली. दुबावितांक म्हापशेंच्या पयलो वर्ग न्यायालयान तीन दीस पुलीस कोठी दिल्या.
कळंगूट पुलिसांनी दिल्ले म्हायती प्रमाण ह्या प्रकरणांत न्यूटन सुपर मार्केटाचे धनी न्यूटन आझावेदो हांणी कागाळ दिली. ते प्रमाण कांदोळे हांगासरल्या सुपर मार्केटांत सदांच म्हालाचो उणाव जाणवतालो. ते प्रमाण वेवस्थापनान चवकशी सुरू केली. तशेंच म्हालाची दीसपट्टी तपासणी सुरू केली.
ह्याच वेळार तीन मनीस व्हड रकमेची खरेदी करीत आशिल्ल्याची म्हायती मुखार आयली. जाल्यार संबंदीत मनीस 100, 150 वा एक हजार रुपया कार्डा वरवीं तशेंच रोख रक्कम दिवन फारीक करीत आशिल्ल्याचें दिसून आयलें. तांच्या खरेदीची सीसीटीव्ही कॅमेरा वरवीं चवकशी केली तेन्ना तो मनीस प्रलिप्ता प्रधान ह्या बायल कॅशियरा कडल्यान सदांच खरेदी करीत आशिल्ल्याचें मुखार आयलें.
ते प्रमाण वेवस्थापनान फाटले स दीस संबंदीत गिरायक आनी कर्मचाऱ्याचेर पाळत दवरून खातरजमा केली. उपरांत वयलो प्रकार मुखार आयले उपरांत सुपर मार्केटांतल्यान 7 लाख 55 हजार 320 रुपया मोलाच्या म्हालाची चोरी केल्ल्याची कागाळ कळंगूट पुलीस स्टेशनार दाखल केली.
हाची दखल घेवन कळंगूट पुलीस निरिक्षक परेश नायक हांच्या मार्गदर्शना खाला उपनिरिक्षक अनील पोळेकार हांणी ओडिशा हांगासरली दुबावीत कॅशियर प्रलिप्ता प्रधान (22) तिचो घरकार आश्वानी प्रधान (26), तिचो देर आशिष प्रधान (24) कर्मचारी अंजना बिश्वास (35) तिचो इश्ट जितेंद्र जिना (23) आनी अस्तंत बंगालांतली कर्मचारी काकली दलाई चक्रवर्ती (32) तिचो घरकार प्रबीर चक्रवर्ती (32) ह्या सात जाणां आड भादंसंच्या 381, 380 आनी आरडब्ल्यू 34 खाला गुन्यांव दाखल करून शेनवारा तांकां अटक केली.
अटक केल्ल्या दुबावितांक आयतारा म्हापशेंच्या पयलो वर्ग न्यायालयांत पुलीस कोठये खातीर हजर करतकूच न्यायालयान दुबावितांक तीन दीस पुलीस कोठी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
