भांगरभूंय | प्रतिनिधी
उल्हास तुयेंकार: 200 इलेक्ट्रीक बशी आयले उपरांत मागणे प्रमाण करतले सुरू
मडगांव: कदंब म्हामंडळा कडेन सादारण 100 बशींचो उणाव आसा. खाजगी बसीचो प्रस्ताव रखडलो. आनी कांय दिसांनी कदंब म्हामंडळा कडेन 200 इलेक्ट्रीक बशी उपलब्ध जातल्यो. त्यो ताब्यांत मेळटकूच प्रवाशांचे मागणे प्रमाण सगल्या मार्गांचेर बशी उपलब्ध करून दितले. बिरेस्तारा मेळपी 20 इलेक्ट्रीक बशी स्मार्ट सिटी उपक्रमा खाला पणजी शारा खातीर आसात अशी म्हायती कदंब म्हामंडळाचे अध्यक्ष आनी आमदार उल्हास तुयेंकार हांणी दिली.
कदंब म्हामंडळा कडेन बशींची मागणी विवीध वाठारांतल्यान करतात. सद्या गरजेच्यो कदंब बशी म्हामंडळा कडेन उपलब्ध नात. ताका लागून सद्या ह्यो मागण्यो पुराय करूंक शकनात. पूण बशी उपलब्ध जाले उपरांत ज्या मार्गांचेर बशीची मागणी करतले थंय कदंब बशी उपलब्ध करून दितले अशें म्हामंडळाचे अध्यक्ष उल्हास तुयेंकार हांणी सांगलें.
कदंब म्हामंडळाक बिरेस्तारा 20 इलेक्ट्रीक बशी मेळटल्यो. पणजी स्मार्ट सिटी प्रकल्पा खाला वट्ट 48 इलेक्ट्रीक बशी उपलब्ध जातल्यो. ज्यो पणजी स्मार्ट शारा खातीर आसतल्यो. तातूंतल्यो 20 इलेक्ट्रीक बशी बिरेस्तारा कदंब म्हामंडळाच्या ताब्यांत येतल्यो.
कदंब म्हामंडळा कडेन आशिल्ल्या खूबशा बशींची किलोमिटराची तांक सोंपल्या. जाल्यार कांय बशी हाचे पयलींच चलोवपाचे स्थितींत नात. कांय बशी नादुरुस्त जायत आशिल्ल्यान रस्त्यार बंद पडल्यार प्रवाशांक ताचो मोटो त्रास सोंसचो पडटा. ताका लागून उपलब्ध आशिल्ल्यो बशी राज्यांतल्या गरजेच्या मार्गार सोडल्यात. गोंया भायरूय कदंब बशी उण्यो केल्यात अशें तुयेंकार हांणी सांगलें.
खाजगी बशींचो प्रस्न रखडलो
कदंब म्हामंडळा कडल्यान कांय खाजगी बशी भाड्यान घेवन त्यो विवीध मार्गांचेर मागणे प्रमाण सोडपाचें थारायिल्लें. ते खातीर प्रक्रिया लेगीत पुराय केल्ली आनी बरो प्रतिसादूय मेळिल्लो. पूण खाजगी बशी कोवीड काळांत बंद उरिल्ल्यान तांची दुरुस्तीचीं कामां आसात. त्यो बशी परतून सुरू करपाक एका बशी फाटल्यान दोन ते तीन लाखांचो खर्च येवंक शकता. ताका लागून हो प्रस्ताव सद्या रखडला अशें उल्हास तुयेंकार हांणी सांगलें.
खाजगी बस धनयांक सबसिडीचो नवो प्रस्ताव
कदंबा कडल्या गाडयांचो उणाव भरून काडपा खातीर खाजगी बशींचो पर्याय उपलब्ध केल्लो. तातूंतल्यान खाजगी बस धनयांकूय थोडें अर्थीक उत्पन्न मेळटलें आशिल्लें आनी कदंबाची सेवाय सुदारतली आशिल्ली. पूण उपलब्ध बशी बंद आशिल्ल्यान ताची दुरुस्ती करपा खातीर खर्च जातलो. ताचे बदला राज्य सरकारा कडल्यान बस धनयांक नव्यो बशी खरेदी करपा खातीर सबसिडीचो पर्याय दिला. कांय जाण हे खातीर तयार आसात, जाल्यार कांय जाण ते परवडपी नाशिल्ल्याचें म्हणलां. ताका लागून सद्या तरी कसलो निर्णय जातलो तें पळोवया अशें मत कदंब म्हामंडळाचे अध्यक्ष उल्हास तुयेंकार हांणी उक्तायलें.
बशी नाशिल्ल्यान गोंया भायर वतात उण्यो बशी
कदंब म्हामंडळा कडेन बशींचो उणाव आशिल्ल्यान गोंयांतल्या विवीध मार्गां वयल्या बशींची संख्या उणी केल्ली ना. पूण गोंया भायर ज्यो बशी धाडून दिताले तांची संख्या उणी केल्या. हाचे पयलीं कर्नाटकांत म्हापशें सावन तीन, मडगांव सावन चार अशा विवीध वाठारांतल्यान वट्ट 12 बशी वताल्यो. सद्या ह्या मार्गार फक्त चार बशी सोडल्यात अशें आमदार उल्हास तुयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
