कंत्राटदार कामां घेतात पूण करिनात

दक्षीण गोंय जिल्हो पंचायत बसकेंत चर्चा करतना वांगडी.

भांगरभूंय | प्रतिनिधी

जिल्हो पंचायत वांगड्यांची कागाळ

कामां केलीं नात तांचेर करतले कारवाय: सुवर्णा तेंडुलकार

मडगांव: कांय कंत्राटदार कामां घेतात पूण काम पुराय करिनात. फक्त कामाचें कंत्राट आपले कडेन घेवन दवरतात. जिल्हो पंचायत वांगड्यांक लोकांक जाप दिवची पडटा असो विशय बसकेंत काडिल्लो. ज्या वांगड्यांचीं कामां जालीं नात, त्या वांगड्यांनी पत्र दिवचें. ज्या कंत्राटदारांनी कामां केलीं नात तांचेर कारवाय करतले अशें दक्षीण गोंय जिल्हो पंचायत अध्यक्ष सुवर्णा तेंडुलकार हांणी सांगलें.

दक्षीण गोंय जिल्हो पंचायतीची बसका बुधवारा सकाळीं पोरण्या जिल्होधिकारी कचेरेच्या इमारतीच्या जिल्हो पंचायत सभाघरांत जाली. ह्या वेळार विवीध विशयांचेर चर्चा जाली. कांय वांगड्यांनी कंत्राटदार आनी अभियंत्या विशींय कागाळी केल्यो.

बसके उपरांत अध्यक्ष सुवर्णा तेंडुलकार हांणी सांगलें, जिल्हो विकास नियोजना खाला दक्षीण गोंय जिल्हो पंचायतीच्या निधींतल्यान पंचायत वाठारांतलीं विकासकामां करचीं. हे खातीर जिल्हो पंचायत वांगड्यांनी आपापल्या वाठारांतल्या पंचायतींक अर्ज व्हरून दिल्ले. तातूंतल्या 30 पंचायतींनी अजूनय सदर विहीत नमुद्यांतले अर्ज दिल्ले नात. जाल्यार 59 पंचायतींनी अर्ज दिल्यात. जिल्हो पंचायतीक 2022 ते 23 मदले अर्ज गरजेचे आसात. पंचायतींनी हाचे आदीं दिल्ले अर्ज ग्राह्य धरचे नात. ते खातीर परतून नव्यान अर्ज मागयल्यात अशें तांणी म्हणलें.

जानेवारी फेब्रुवारी म्हयन्यांत जिल्हो पंचायतीक निधी मेळ्ळा. उपरांत अदमासपत्रक आनी हेर प्रक्रिया केल्यात. पूण निविदा काडपाक म्हयन्याचो कळाव जाला. अभियंत्यांची बदली आनी बडटी प्रक्रियेक लागून कामाच्या निविदा प्रक्रियेक कळाव जाला. आतां ज्या 36 कामांची निविदा काडटात ती 15 दिसां पयलीं काडपाची आशिल्ली अशें सुवर्णा तेंडुलकार हांणी सांगलें.

जिल्हो भवना खातीर सरकारा कडेन प्रस्ताव

दक्षीण गोंय जिल्हो भवनाच्या उबारणे खातीर जिल्हो पंचायती कडल्यान गोंय सरकारा कडेन प्रस्ताव धाडून दिला. पूण अजून सरकारा कडल्यान कसलेच तरेची मंजुरी मेळिल्ली ना. सुवात अजून लेगीत निश्चीत जाल्ली ना. हाचे आदीं तीन सुवातो पळयिल्ल्यो अशी म्हायती सुवर्णा तेंडुलकार हांणी दिली.