भांगरभूंय | प्रतिनिधी
मडगांव, प्रतिनिधी : राज्यांतल्या अनुसुचीत जमाती (एसटी) समाजाचो आंकडो खूब आसून लेगीत ते प्रमाण तांकां राजकीय आरक्षण कित्याक दिना, असो प्रस्न दक्षीण गोंयचे खासदार फ्रांसीस सार्दीन हांणी केला. हेर राज्यांनी अनुसुचीत जमाती समाजाक राजकी आरक्षण आसा. राज्य सरकार आनी केंद्र सरकारानूय गोंयांत राजकी आरक्षण फुडले वेंचणुके मेरेन दिवचें, अशी मागणी सार्दीन हांणी केली.
दक्षीण गोंय कॉंग्रेस कार्यालयांत खासदार सार्दीन हांणी पत्रकार परिशदेंत अनुसुचीत जमाती समाजाक राजकी आरक्षण दिवपाची मागणी केली.
बायलां आरक्षण कायदो सध्या केलो, पूण ताची अमलबजावणी 2029 त जावपाक शकता. एसटी आरक्षणाचो मुद्दोय आडखळून दवरला. लोकांक फकत आस्वासनां दित रावपाचें. पूण तीं पुराय करिना. अशी भाजपची निती जावन आसा. लोकांक फटोवन भाजपा सत्ता चलयता. देशांत कारगील, लडाख हांगा पालिका वेंचणुको जाल्यो. थंयचे लोक सत्ताधार्यां आड आशिल्ल्याचें दाखोवन दिलें. आतां पांच राज्यांच्या वेंचणुकांतूय लोक भाजपा आड मतदान करतले, हातूंत कसलोच दुबाव ना, अशें तांणी सांगलें.
लायट परत परत वचपाचो प्रस्न निर्माण जाला. आतां वारोय ना आनी पावसूय ना. तरीय लायट वचप चालूच आसा. बर्या दर्जाचें सामान वापरचें. लोकांक बरी सेवा दिवची. रस्त्यार वता थंय फोंडकुलां पडल्यांत. लोकांक तातूंत पडपाचें ना. भौशीक बांदकाम खात्यान रस्ते सारके करचे. राज्यांत डेंग्यूचे दुयेंती वाडल्यात. ताका लागून भालयकी खात्यान सगळ्या वाठारांनी नितळसाण दवरची आनी हेर उपाय येवजण्यो करच्यो. अंदू पावस बरो पडला. डोंगरावेल्या पिकां खातीर तो बरो, पूण सकयल्या वाठारांतल्या पिकांचेर हाचो फटको बसला. हाची पळोवणी करून सरकारान नुकसाण भरपाय दिवची, अशी मागणी सार्दीन हांणी केली.
मडगांवा घाउक नुस्तें मार्केटांत परंपरीक नुस्तेंकारांक नुस्तें विकपाक दिनात. थळाव्या नुस्तेंकारां खातीर मार्केटांत जागो उपलब्ध करून दिवचो. बोटकार, रांपणकार हांची नुस्तें विकपाची खंयचीच वेळ नासता. भरती आनी सुकतेचेर नुस्तें मारपाचो वेळ थारता. तांकां एसजीपीडीए कडल्यान जागो उपलब्ध करून दियात अशेंय सार्दीन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
