एमपीएन आदेशांक पाळो दिलो ना जाल्यार येरादारी आडायतले: संकल्प

भांगरभूंय | प्रतिनिधी

गेट क्रमांक णवांतल्यान जावपी येरादारी उडयतले बंद

वास्को: मुरगांव बंदर प्राधिकरणान (एमपीए) बंदरांतल्यान जावपी ट्रक येरादारी विशीं मार्गदर्शक तत्वांचे जे दोन आदेश काडिल्ले त्या आदेशांचे उल्लंघन मुरगांव बंदर प्राधिकरणा कडल्यान जायत आशिल्ले खातीर मुरगांवचे आमदार संकल्प आमोणकार हांणी काल (बिरेस्तारा) तिडक उक्तायली. ह्या प्रकरणांत योग्य तो उपाय काडलो ना जाल्यार मुरगांव बंदराच्या गेट णवांतल्यान जावपी येरादारी आमी बंद उडयतले अशी शिटकावणी दिली. मुरगांव बंदर प्राधिकरण हें मुरगांव बंदरांतल्या ट्रक येरादारी संबंदी गंभीर नासलें तरी आमी नागरिकांच्या जिवा कडेन खेळूंक दिवचे नात अशें आमोणकारान स्पश्ट केलें.

गेट क्रमांक णवांतल्यान यो-वच करपी ट्रकांक लागून मुरगांव बंदरांतली येरादारी चर्चेंत आयल्या. ह्या प्रकरणांत नागरिकांचे बोट आमोणकारा वटेन वळूंक लागिल्ल्यान तांणी ह्या प्रकरणाची गंभीर दखल घेवन मुरगांव बंदर प्राधिकरणाक शिटकावणी दिल्या.

डिसेंबर 2022 त सडा हांगासरल्या कांय जाणांनी णव क्रमांकाच्या प्रवेश दारांतल्यान कोळसो घेवन भायर येवपी ट्रक आडायिल्ले. ताका लागून सात दीस येरादारी ठप्प जाल्ली. ह्या प्रकरणांत उपजिल्होधिकारी, जिल्होधिकारी तशेंच मुख्यमंत्री हांणी हस्तक्षेप करून प्राधिकरणाच्या अधिकाऱ्यां बरोबर चर्चा केली. उपरांत प्राधिकरणान 20 डिसेंबर 22 दिसा एक आदेश काडलो. ते प्रमाण मुरगांव बंदरांतली सगली येरादारी गेट क्रमांक एकांतल्यान जातली. हीं वाहनां सडा मार्गान बायणा उड्डाण पुला वयल्यान वरुणापुरी वचून मुखार वतलीं.

ज्या दिसा क्रुझ टर्मिनलांत पर्यटक घेवन येवपी बोट येतली त्या दिसा फक्त ही येरादारी गेट क्रमांक णवांतल्यान जातली असो आदेश काडिल्लो. तशेंच 3 जानेवारी 2023 दिसा दुसरो आदेश काडिल्लो तातूंत सगल्या ट्रकांचेर ताडपत्री घालून म्हाल धांपूक जाय. ट्रकाच्या हौदाचे उंची मेरेन म्हाल भरूंक जाय. जंय म्हाल देंवयतले, थंय ट्रक धुवून परतून बंदरांत हाडचो. बंदरांतल्यान भायर पडटना ट्रकांची रोदां उदकान धुवूंक जाय अशी अट त्या आदेशांत घाल्ल्यो. पूण त्या आदेशांची अंमलबजावणी जायत नाशिल्ल्याचें आमोणकारान म्हणलें.

मुरगांव बंदर प्राधिकरण आपली जापसालदारकी फांफडून उडयत आशिल्ल्याचें दिसून येता. सद्या सगली येरादारी गेट क्रमांक णवांतल्यान जायत आसा. ताका लागून आयओसी आनी सडा व्हॉल्तार व्हड ट्रकांक व्हॉल्त घेतना तीन ते चार फावटी फाटीं फुडें करचें पडटा. ह्या वेळार थंय क्लिनर नासता. ताका लागून संबंदीत ट्रक चालकांक फाटले वटेन खंयचे वाहन आसा हें कळनाशिल्ल्यान हेर वाहन चालकांच्या जिवाक धोको उप्रासत आशिल्ल्याचें तांणी सांगलें.

मुरगांव बंदर प्राधिकरण आनी तांच्या कामगारांच्या विरोधांत हांव ना. मजगतीं, प्राधिकरणान नेमांक पाळो दिवचो. हांव नागरिकांच्या जिवा कडेन खेळूंक शकना. ह्या प्रकरणांत योग्य तो उपाय काडपा खातीर प्राधिकरणान ताकतिकेची बसका आपोवची अशें आमोणकारान म्हणलें.

प्राधिकरण फक्त आपलो वेवसाय पळयता. लोकांचें तांकां कांयच पडिल्लें ना. थंय स्विपींग मशीन आसून लेगीत ताचो वापर जायना. रस्त्यार उदक शिंपडावप जायना अशेंय आमोणकारान स्पश्ट केलें.