भांगरभूंय | प्रतिनिधी
पणजी, बातमीदार : धावी नापास जाल्ल्या विद्यार्थ्यांनी एक वर्स आयटीआय केल्यार १० वी तशेंच २ वर्सां आयटीआय केल्यार तांकां १२ वी पास अशें मानतले. अशा उमेदवारांक सरकारी नोकरे खातीर संद दितले अशें मुख्यमंत्री डॉ. प्रमोद सावंत हांणी सांगलें. पर्वरे जाल्ल्या गोंय माध्यमीक आनी उच्च माध्यमीक शिक्षण मंडळाच्या नवे इमारतीचे उक्तावण कार्यावळी वेळार मुखेल सोयरे म्हणून ते उलयताले.
हे कार्यावळीक म्हायती तंत्रज्ञान मंत्री रोहन खंवटे, समाजकल्याण मंत्री सुभाष फळदेसाय, आमदार दाजी साळकार आनी वरिष्ठ प्रशासकीय अधिकारी माचयेर हाजीर आशिल्ले.
आदीं परस आतां धावी पास जावप सामकें सोपें. चडांत चड गूण मेळचे अश्या तरेच्या विशयांचो हातूंत आसपाव आसा. खंयचेय सरकारी नोकरे खातीर धावी पास जावन गरजेचें जालां. ताका लागून धावे फेल जावपी विद्यार्थ्यां खातीर सरकारान कांय निर्णय घेतल्यात. पालकांनीय भुरग्यांचेर धावी पास जावपा खातीर चेंपण हाडचें न्हय. धावी फेल जावन जो विद्यार्थी एक वर्साची आयटीआय करतले ते विद्यार्थी धावी पास जाले अशें धरतले. आनी आयटीआयचीं दोन वर्सां जो विद्यार्थी पास करतलो तो बारावी पास अशें समजतले. हे विद्यार्थी सरकारी नोकरे खातीर यत्न करपाक शकतात, अशें मुख्यमंत्र्यान म्हणलें.
गोंय शालान्त मंडळ गोंयांत एक्सटर्नल सुविधा दितलें. तालुक्या प्रमाण शाळो निश्चीत करून मंडळान ह्यो सुविधा दिवच्यो. गोंयां भायल्या बोगस शिक्षण संस्थांचेर बंदी हाडपाक हें गरजेचें अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
