भांगरभूंय | प्रतिनिधी
विनयभंग केल्ल्या प्रकरणांत वेर्णें पुलिसांनी केली अटक
मुरगांव: विरोध आसून लेगीत एके बायलेक व्हॉट्सअॅप संदेशा वरवीं मोग, आपुलकी दाखोवपी 53 वर्सा पिरायेच्या दादल्याक म्हारग पडलें. झुआरीनगरांतले ते बायलेच्या फ्लॅटांत घुसून विनयभंग केल्ल्या प्रकरणांत वेर्णें पुलिसांनी गुन्यांव नोंद करून आरोपीक बुधवारा रातीं अटक केली. न्यायालयान आयज (बिरेस्तारा) ताची जामिनाचेर सुटका केली.
बायलेचो विनयभंग केल्ल्या प्रकरणांत वेर्णे पुलिसांनी 53 वर्सा पिरायेच्या दादल्याक अटक केली. वेर्णे पुलिसांनी दिल्ले म्हायती प्रमाण झुआरी नगर सांकवाळ हांगाचो मनोज नायक नांवाच्या मनशान बायलेक व्हॉट्सअॅप संदेशा वरवीं मोग, आपुलकी दाखयतालो. हाका ते बायलेचो विरोध आसून लेगीत तो सेगीत तिका व्हॉट्सअॅप संदेश धाडटालो.
मजगतीं, ते बायलेन दाखल केल्ले कागाळीच्या आदाराचेर आयपीसी कलम 354(डी), 354, 323, 448, 504, 506 (ii) खाला ताका अटक केली. कागाळींत म्हणिल्लें प्रमाण आरोपीन 10 ऑगस्ट दिसा सांजवेळा 6.30 वरांचेर बायलेचो फाटलाग केलो. ताणें कागाळदार बायलेचेर आनी तिच्या सोयऱ्यांचेर जिवघेणो हल्लो करपाच्या उद्देशान लोखंडाचो वारांव घेवन ते बायलेच्या फ्लॅटांत घुसखोरी केली. आरोपीन ते बायलेचो हात धरून तिका आपले वटेन ओडले उपरांत सोयऱ्यांनी ताका आडावन परती जाप विचारले उपरांत आरोपीन ते बायलेक गाळी संवल्यो. आरोपीन तांकां गंभीर परिणामाक तयार रावपाची धमकीय दिली.
ह्या प्रकरणाचो फुडलो तपास पुलीस उपनिरिक्षक प्रवीण शिमे पुरशकार हे पुलीस निरिक्षक डायगो ग्रासियस हांच्या फुडारपणा खाला करतात.
मजगतीं, आनीक एके घडणुकेंत वेर्णें पुलिसांनी झुआरी नगरांत रावपी संतोष पडणकट्टी (25) हाका मारपेट केल्ल्या प्रकरणांत झुआगरी नगरांतलो रामगोपाल यादव (42) हाका अटक केल्या.
वेर्णें पुलिसांनी दिल्ले म्हायती प्रमाण बिर्ला झुआरी नगरांतलो संतोष पडणकट्टी (25) हाचे कागाळी वयल्यान यादवाक आयपीसी कलम 323, 504, 506 (ii) खाला अटक केली. मंगळारा रातीं आरोपीन कागाळदार संताेष हाका खर मारपेट केली. तशेंच गाळी संवल्यो आनी गंभीर परिणाम भोगचे पडटले अशी धमकी दिली. कॉन्स्टेबल उमेश नायक फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
