भांगरभूंय | प्रतिनिधी
-गोंय अॅग्मूट कॅडर खाला आशिल्ल्यान भाशेचीय सक्ती ना
पणजी : फाटल्या पांच वर्सांत राज्यांतल्या एकाय आयएएस अधिकाऱ्याक राजभाशा कोंकणीचें प्रशिक्षण दिवंक नाशिल्ल्याचे मुख्यमंत्री डॉ. प्रमोद सावंत हांणी दिल्ले म्हायतीतल्यान उक्तें जालां.
सरकारी कामकाजांत कोंकणीचो चडांत चड वापर करपाचे निर्देश सरकारान सगल्याच खात्यांक जारी केल्यात. ते खातीर खातें मुखेली आनी सचिवांक कोंकणीचें गिन्यान आसप गरजेचें.
राज्यांत आशिल्ल्या सचिवांक टप्प्याटप्प्यान कोंकणीचें प्रशिक्षण दितले, अशें कांय वर्सां पयलीं मुख्यमंत्री डॉ. प्रमोद सावंत हांणी सांगिल्लें. पूण फाटल्या पांच वर्सांत एकाय आयएएस अधिकाऱ्याक कोंकणीचें प्रशिक्षण दिवंक ना. आयएएस अधिकाऱ्यांक कोंकणीचें प्रशिक्षण दिवपाची जापसालदारकी ‘जिपार्ड’ चेर सोंपयल्या, अशी म्हायती तांणी दिली.
मजगतीं, गोंया खातीर स्वतंत्र आयएएस कॅडर ना. गोंय अॅग्मूट कॅडर खाला येता. सरकारी कारभार सुरळीतपणान चलोवपाक गोंयांत येवपी आयएएस अधिकाऱ्यांक कोेंकणीचें गिन्यान आसप गरजेचें. पूण गोंय अॅग्मूट कॅडरा खाला येता, ताका लागून आयएएस अधिकाऱ्यांक कोंकणीचे गिन्यान आसचे, अशी सक्ती ना, अशीय म्हायती मुख्यमंत्र्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
