भांगरभूंय | प्रतिनिधी
आयटका वतीन कामगारांची काडली रॅली
पणजी: आंतरराष्ट्रीय पांवड्यार कामगार दीस व्हड प्रमाणांत मनयतात. ह्या दिसा सगल्या पांवड्यार कामगारांनी एकठांय येवन तांचेर जावपी शोशणा आड उबे रावया. येता ते लोकसभा वेंचणुकेंत आपलो एकवट दाखोवन दिवया अशें आवाहन ऑल इंडिया ट्रेड युनियन काँग्रेसीचे (आयटक) सचीव ख्रिस्तोफर फोन्सेका हांणी केलें.
आंतरराष्ट्रीय कामगार दिसा निमतान आयटका वतीन गोंयांतल्या कामगारांची रॅली काडली. उपरांत जाल्ले जाहीर कार्यावळी वेळार तांणी पत्रकारां कडेन संवाद सादलो.
सरकाराच्या कामगार विरोधी धोरणा आड आतांच एकठांय येवंक जाय. फाटले कितलेशेच दीस उण्यांत उणो पगार वाडोवपाची मागणी करून लेगीत ताचेर विचार करिनात. पूण कामगार विरोधी धोरणां मंजूर करतात. गोंयांत कदंब, पीडब्ल्यूडी, दूद वेवसाय, उद्देगीक मळ, आंगणवाडी, मुळाव्या शाळांचे कर्मचारी अशा खूबशा कामगारांच्यो मागण्यो प्रलंबीत आसात अशें फोन्सेका हांणी सांगलें.
ह्या वेळार विवीध मागण्यो केल्यो. हातूंत मुखेलपणान उण्यांत उणो पगार वाड, इंद्रजीत गुप्ता समितीन सुचयिल्ल्या राज्य निधीची अंमलबजावणी, त्रिपक्षीय भारतीय कामगार परिशदेचें आयोजन, अर्थशास्त्रातल्या मुखेल संस्थांचें खाजगीकरण थांबोवप, 4 कामगार कोड रद्द करप, पेन्शन येवजण (ईपीएस-95) दुरुस्त करप, ‘सगल्यांक नोकरेचो अधिकार’ ची खात्री, पंचायत कामगारांक सातवो वेतन आयोग लागू करप, न्हंय परिवहन विभागाक चड वरांचे पयशे दिवप, सगल्या आंगणवाडी सेविकांक म्हयन्याक 10 हजार पगार दिवप, हॉटेल आनी कसिनोंतल्या कामगारांचें शोशण थांबोवप, गोंयांतलें खणकाम ताकतिकेन सुरू करप अशा विवीध 30 मागण्यांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
