भांगरभूंय | प्रतिनिधी
गुजरात मॉडेल आपणावचो; उद्देग मंत्र्यान मुख्यमंत्र्या कडेन चर्चा करची
संसदेंतूय उप्रासलो बेरोजगारीचो विशय
हेर राज्यांचे तुळेन गोंयची बेरोजगारीची टक्केवारी मोटी
बेरोजगारीक लागून तरणाटे मानसीक तणावा खाला
म्हापशें: गोंयांतली वाडटी बेरोजगारी हो हुस्क्याचो विशय. गोंयांत नव्या उद्देगीक गुंतवणुकेक चालना दिवंक जाय. हे खातीर उद्देगीक गुंतवणुके खातीर एक जनेल प्राणाली राबोवन सरकारान रोजगार निर्मिती खातीर पावलां उबारचीं असो सल्लो कळंगूटचे आमदार मायकल लोबा हांणी सरकाराक दिला.
काल (शुक्रारा) सांजवेळा कळंगूटे आयोजीत केल्ले पत्रकार परिशदेंत मायकल लोबो उलयताले. उद्देग मंत्र्यान मुख्यमंत्र्या कडेन हे विशीं चर्चा करची. एक जनेल प्रणाली राबयल्यार एकाच पाख्या खाला सगले परवाने संबंदितांक मेळटले. ते खातीर गोंयांत वेवसाय करप सोयिस्कर जातलें अशें मत लोबो हांणी उक्तायलें.
सरकारी नोकऱ्यांतल्यान हो बेरोजगारीचो प्रस्न सुटचो ना. आमचें गोंय ल्हान आसलें तरी लेगीत नव्या उद्देगीक गुंतवणुकीक सरकारी नेमांक सामकार वच्चें पडटा. सरकाराची अनास्था आनी एक जनेल प्रणालीचो उणाव हें हाचें फाटलें मुखेल कारण आसा अशें लोबोन म्हणलें.
आयज देशाचे संसदेंतूय गोंयांतल्या बेरोजगारीचो मुद्दो मुखेलपणान उपस्थीत जायत आसा. हाचे वयल्यान ह्या प्रस्नाची गंभीरताय लक्षांत येता. हेर राज्यांचे तुळेन गोंयची बेरोजगारीची टक्केवारी खूब मोटी आसा. फाटल्या सात वर्सां सावन बेरोजगारी वाडत आसा. उच्च शिक्षण घेवन लेगीत तरणाट्यांक नोकऱ्यो मेळनात. हाचे कडेन सरकारान गंभीरतायेन पळोवंक जाय. गुजरातांत एक जनेल प्रणाली राबयल्या. थंय भेट दिवन मुख्यमंत्री आनी मंत्र्यान ह्या प्रणालीचो अभ्यास करचो अशी सुचोवणी लोबोन केली.
एक जनेल प्रणालीक लागून एकाच पाख्या खाला उद्देजकांक सगले सरकारी परवाने मेळटले. पूण सद्या बारीक सारीक गजालींक लागून संबंदितांक एके कडल्यान दुसरे कडेन धांवपळ करची पडटा. अशे परिस्थितींत नवे उद्देजक गोंयांत गुंतवणूक कशे करतले?. ही सरकारी प्रणाली सुटसुटीत आनी सोंपी जायना तो मेरेन पर्यटन आनी फार्मा सारके गुंतवणूकदार गोंयांत येवचे नात. कांय जाण लॉजिस्टीक हबाच्यो गजाली करतात. पूण हांगा एक जनेल प्रणालीच ना अशी टिका लोबोन केली.
उद्देग मंत्र्यान मुख्यमंत्र्या बरोबर एकठांय बसून नव्या उद्देगीक गुंतवणुकीक जावपी सरकारी आडमेळीं पयस करपा खातीर फुडाकार घेवचो. सरकारान सर्वे केल्यार गोंयांतलो शिक्षीत बेरोजगारीचो नेमको आंकडो स्पश्ट जातलो अशें मायकल लोबोन म्हणलें.
पदवीधर आनी उच्च शिक्षीत तरणाटो वर्ग नोकरी नाशिल्ल्यान सद्या तणावा खाला आसा. रोजगार नाशिल्ल्यान मनीस मानसीक नदरेन खचता आनी ताचें खच्चीकरण जाता. नोकरी नाशिल्ल्यान खूबशे सुशिक्षीत तरणाटे स्वताक घरांनी बंद करून घेत आसात असो दावो मायकल लोबोन केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
