भांगरभूंय | प्रतिनिधी
गोवा कॅनाचें भलायकी खात्याक पत्र
म्हापशें: पियेवपाच्या उदकाचे येरादारी खातीर वापरतल्या उदकाच्या टँकरा वयलें स्टेनलेस स्टिलाच्यो टांकयो प्रमाणीत करपाचें तंत्रीक ज्ञान भलायकी खात्याच्या अधिकार्यांक आसा? असो प्रस्न उपस्थीत करून हे विशीं गोवा कॅन ह्या ग्राहक हक्काचेर आदारीत आपसेवी संस्थेन भलायकी संचालका कडेन स्पश्टीकरण मागलां.
हालींच उदका स्रोत खात्यान उदकाच्या टँकरा विशीं लोकजागृतायेची सुचोवणी केल्या. ते प्रमाण उदकाचे टँकर स्टेनलेस स्टिलाचे आसचे आनी ते भलायकी सेवा संचालनालय आनी भूजल अधिकारी हांणी प्रमाणीत करूंक जाय अशें ह्या भौशीक सुचोवणी पत्रांत खात्यान नमूद केलां.
हे विशीं गोवा कॅनाचे समन्वयक रोलंड मार्टिन्स हांणी भलायकी सेवा संचालनालयाच्यो संचालक डॉ. गीता काकोडकार हांकां पत्र बरयलां. उदकाच्यो स्टेनलेस स्टील टांकयो प्रमाणीत कश्यो करच्यो हाची खात्या कडेन तंत्रीक म्हायती आसा? आनी तशें आसल्यार भलायकी संचालनालयांतलो खंयचो अधिकारी हें प्रमाणपत्र दितलो. तशेंच हें प्रमाण मुळावें भलायकी केंद्र, नागरीक भलायकी केंद्र आनी सामुदायीक भलायकी केंद्राच्या पांवड्यार लेगीत दितले व्हय हें स्पश्ट करचें अशी मागणी तांणी केल्या.
तशेंच गोंय भूजल नियमन कायदो 2002 आनी नेम 9(2) फॉम 10 खाला नेम 2003 प्रमाण भलायकी संचालनालयाक पियेवपा योग्य उदक व्हरपा खातीर टँकराचे योग्यताये विशीं हरकत ना प्रमाणपत्र जारी करपाचो अधिकार आसा. तशेंच वयल्या कायद्या प्रमाण दर स म्हयन्यांनी भलायकी सेवा संचालनालया कडल्यान हें हरकत ना प्रमाणपत्र घेवंक जाय. हो नेम मार्टिन्स हांणी ह्या पत्रा वरवीं भलायकी खात्याच्या संचालकांचे नदरेक हाडून दिलां.
गरजेचें तज्ञ नासून लेगीत अधिकार्यां कडल्यान अशें प्रमाणीकरण करता आसत, वा भूजल कायदो 2002 आनी नेम 2003 त नमूद आसून लेगीत प्रमाणन करिनात जाल्यार तें ग्राहक संरक्षण कायदो 2019 खाला सेवेचो उणाव म्हूण गणटले अशें रोलंड मार्टिन्स हांणी ह्या पत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
