भांगरभूंय | प्रतिनिधी
लोकां मदीं तिडकीचें ल्हार; आमदार आंतोन वास हांणी घेतली गंभीर दखल
वास्को: उदक व्हरपी टँकरांनी सेप्टीक टँकरांतले घाणयारें उदक भरपाचे घडणुकेची कुठ्ठाळीचे आमदार आंतोन वास हांणी गंभीर दखल घेतना तांचे आड खर कारवाय करपाचे निदेश संबंदितांक काल (बुधवारा) दिले. उदक व्हरपी टँकरांतल्यान द्रवाचो नमुनो भलायकी खात्याच्या संबंदीत अधिकार्यांनी एकठांय करून तपासणे खातीर प्रयोगशाळेंत धाडला. तो अहवाल मेळ्ळे उपरांत योग्य ती कारवाय करतले अशें वेर्णें पुलीस स्टेशनाचे निरिक्षक डायगो ग्रासिएस हांणी सांगलें.
सांकवाळ पंचायतीचे एके सुवातेर 21 वेर सांजवेळा एका उदक व्हरपी टँकरांत सेप्टीक टँकरांतलें घाणयारें उदक भरीत आशिल्ल्या प्रकरणांत थंयच्या रहिवाशांनी वेर्णें पुलिसांक म्हायती दिल्ली. ते प्रमाण ते दोनूय टँकर वेर्णें पुलिसांनी ताब्यांत घेतिल्ले. उदक व्हरपी टँकरांतल्यान घाणयारें उदक व्हरपाचो प्रकार उक्तडार आयले उपरांत लोकां मदीं तिडकीचें ल्हार पातळिल्लें. ह्या उदक व्हरपी टँकरां वरवीं सांकवाळ वाठारांत उदका पुरवण करताले. त्याच टँकरांतल्यान घाणयरें उदक व्हरतात हें उक्तडार आयिल्ल्यान प्रदेश काँग्रेसीन लेगीत गंभीर दखल घेतना आवाज काडिल्लो.
ह्या प्रकरणांत दखल घेतना आमदार वास हांणी बुधवारा सकाळीं भलायकी, पुलीस, उदका स्रोत, येरादारी ह्या खात्यांच्या संबंदीत अधिकार्यांची बसका घेवन चर्चा केली. लोकांचे भलायके कडेन आनी जिवा कडेन खेळप्यां आड खर कारवाय करपाची सुचोवणी वास हांणी केली.
ह्या वेळार हाजीर आशिल्ले भलायकी खात्याचे अधिकारी डॉ. तेजस लोटलीकार हांणी सदर टँकरांतलो द्रव नमुनो घेतलो. ते संबंदीचो अहवाल आयले उपरांत फुडली कारवाय करतले अशें सांगलें. बेकायदो उदक व्हरपी, सेप्टीक टँकरा आड कारवाय करतले अशें येरादारी खात्याच्या अधिकार्यांनी सांगलें.
जांच्या परवान्यांची मुजत सोंपल्या अशा सगल्या उदक व्हरपी टँकरांची वळेरी दिवपाचे निर्देश उदका स्रोत खात्याच्या अधिकार्यांक आमदार वास हांणी दिले. वेर्णे पुलिसांच्या ताब्यांत आशिल्ल्या दोनूय टँकरांचे परवाने निलंबीत करपाचे निर्देश येरादारी खात्याच्या अधिकार्यांक आमदार वास हांणी दिले.
सांकवाळ पंचायत वाठारांत एकेच सुवातेर उबे रावपी कांय सेप्टीक टँकरा संबंदी येरादारी खातें योग्य ती चवकशी करतले. त्या दोनूय टँकरां मदीं सेप्टीक टँकराच्या परवान्याची मुजत मार्च 2022 वर्सा सोंपिल्ली. मजगतीं, त्या टँकरांतल्यान अवैध रितीन घाणयारें उदक व्हरताले अशें आमदार वास हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
