भांगरभूंय | प्रतिनिधी
गोंया भायले पुलीस छळ प्रकरण
म्हापशें: गोंया भायल्या पुलिसां कडल्यान जावपी छळणुकीच्या निशेधार्थ उत्तर गोंयांतल्या शेटींनी आपलें आंदोलन सुरूच दवरलां. हाचोच वांटो म्हूण ह्या कारागिरांनी तीन दीस आपलीं दुकानां बंद दवरल्यांत.
अखील गोंय दैवज्ञ सुवर्णलंकार कारागीर संघटणेच्या फुडारपणा खाला संघटणेच्या उत्तर गोंय फांट्याच्या वांगड्यांनी ह्या आंदोलनांत वांटो घेतला. ते प्रमाण मंगळार 13 ते बिरेस्तार 15 मेरेन ‘दुकान बंद’ आंदोलन राबयलां.
फाटल्या कांय म्हयन्यां सावन म्हापशें सयत उत्तर गोंयांतल्या शेट कारागिरांनी चोरां कडल्यान चोरयेच्यो भांगरा वस्ती खरेदी केल्ल्याच्या नांवा खाला देशांतल्या कांय राज्यांतल्या पुलिसांनी छळ सुरू केला.
चोरांक गोंयांत हाडून खंयच्याय दुकाना मुखार उबे करतात आनी त्या दुकानदारा कडल्यान भांगर वसुलीच्या नांवान लुबाडणूक करपाचो प्रकार सर्रासपणान सुरू आसा. हे खातीर खाकी भेसाचो धाक दाखयतात असो दावो शेट कारागिरांचो आसा.
हो एकूण प्रकार शेट वेवसाय नश्ट करपी आसा. हाचो निशेध म्हूण फाटल्या 15 दिसां सावन शेट कारागिरांनी गोंयांत आंदोलन सुरू केलां. हाचोच भाग म्हूण तीन दीस दुकान बंदचें आंदोलन सुरू केलां अशें संघटणेच्या वांगड्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
