भांगरभूंय | प्रतिनिधी
गोविंद गावडे: एसटी समाजांत फूट घालपाचो यत्न; सुवार्थी लोकां पसून सादूर रावचें
मडगांव: कांय सुवार्थी लोक सोडल्यार एसटी समाज हो उटा बरोबर आसा. समाजा खातीर कांयच करूंक नाशिल्ल्या लोकां कडल्यान आंदाेलनाच्या नांवा खाला पयसो एकठांय करपाचो धंदो सुरू आसा. उटा ही संस्था भाजपाचे दावणेक बांदिल्ली ना. राजकी आरक्षणाचो मुद्दो उटा संस्थेनूच मुखार हाडला आनी फुडारांत उटा हीच संघटणा राजकी आरक्षण मेळोवन दितली अशें मत खेळां मंत्री गोविंद गावडे हांणी प्रेरणा दिना वेळार उक्तायलें.
मडगांवां रवींद्र भवनाच्या सभाघरांत प्रेरणादिनाचें आयोजन केल्लें. ह्या वेळार खेळां मंत्री गोविंद गावडे, समाजकल्याण मंत्री सुभाष फळदेसाय, उटाचे अध्यक्ष प्रकाश वेळीप, आदले आमदार वासुदेव मेंग गांवकार, संचालक दशरथ रेडकार, दिलीप वेळीप हांची घरकान्न दीपा, पूत दक्ष आनी हेर मानेस्त हाजीर आशिल्ले.
मंत्री गावडे हांणी मुखार उलयतना म्हणलें, एसटी समाजान अधिकार आनी हक्क मेळोवपा खातीर केल्ल्या आंदोलनांत मंगेश गांवकार, दिलीप वेळीप हांणी बलिदान दिलां. समाजांतले आतांचे पिळगेक जें कितें अधिकार आनी हक्क मेळत आसात ते गांवकार आनी वेळीप हांच्या बलिदानाक लागून आसात, हें कळप गरजेचें आसा. कोणतरी ह्या दिसा शोकोत्सव म्हणटात पूण हांगा दोगां भावांच्या बलिदानांतल्यान प्रेरणा घेवन समाजाक मुखार व्हरपाचें काम करपा खातीर एकठांय आयल्यात.
जांणी समाजा खातीर चार आण्याचें काम केलें ना ते दोश दिवपी कोण असो प्रस्न करून, सुवार्था खातीर समाजाची दिशाभूल करपाचो यत्न सुरू आसा. समाज एकवटान उरपा खातीर खूबशा जाणांनी त्याग केला. ती एकवट नश्ट करपाचो यत्न केला. हाचे आदीं काँग्रेस सरकाराच्या कार्यकाळांत राजकी आरक्षण कित्याक मेळ्ळें ना, साश्टींतल्या क्रिस्तांव भावांनी जावपी दिशाभूल समजून घेवची अशें आवाहन गावडे हांणी केलें.
जांणी बडयांचो मार खाला तांणी केन्नाच फायदो घेतलो ना. उटा ही संस्था खंयचेच बाबतींत कोणाचेच दावणेक बांदिल्ली ना. मंगेश गांवकार आनी दिलीप वेळीप हांच्या बलिदानाच्या नांवार क्यूआर कोड धाडून पयशे एकठांय करतात. समाजा खातीर आंदोलन करपाचें नाटक करून पयशे एकठांय करपाचो वेवसाय कांय जाणां कडल्यान सुरू आशिल्ल्याचो आरोप गावडे हांणी केलो.
जांकां विधानसभेच्या वेंचणुका वेळार 300 परस चड मतां घेवंक येनात ते फुडारी जावन समाजांत फूट घालपाचें काम करतात. एसटी समाजाक राजकी आरक्षण ही उटा संस्थेची मुखेल मागणी आशिल्ली आनी ते खातीर गरजेचे यत्न करीत आसात. कांय जाण छुपो अजेंडा राबयतात. वैजकी आरक्षणा खातीर उटा संस्थेनूच यत्न केल्यात. कांय जाण पत्रकार परिशद घेवन उटाचो आनी आपलो कसलोच संबंद नाशिल्ल्याचें म्हणलां. ताका लागून एखादो फुडारी गेलो म्हूण उटा संस्था कोलमोडून पडची ना आनी समाजांतूय फूट पडची ना. उटाच्या यत्नाक लागून हजारांनी विद्यार्थ्यांक शिक्षण, नोकऱ्यो आनी कुटुंबाचो उदरनिर्वाह सुरू आसा. गोंयच्या एसटी समाजाचो 2779 इतलो आशिल्लो नोकऱ्यांचो बॅकलॉग आतां 300 परस उणो जाला. युक्ती आनी बुद्धीच्या मळार मार्गक्रमण करपाचें सोडून अशी भाशा करप चुकीचें आसा अशेंय मंत्री गोविंद गावडे हांणी स्पश्ट केलें.
फूट घालपी सुवार्थी: गोविंद गावडे
समाजाचे उदरगती खातीर गरजे वेळार आंदोलनां करूंक जाय, पूण ताचे मार्गूय योग्य आसचे. समाजा खाीतर काम करूंक नाशिल्ल्या आनी काम करपा हेतान पयशे सोदप्यां पसून सादून रावात. समाजांत फूट घालपी हे सुवार्थी आसात. कांय जाणांच्या मस्तकांत गेल्ली सत्तेची नशा आयज नाजाल्यार फाल्यां केन्ना तरी देंवतली. एसटी समाजांत फूट घालपी फुडारी हे काँग्रेसीचे बूट चाटपी आसात. कोणाक तरी वेंचणूक लढोवपाचें उमाळें लागल्यात. गॅझेटेड अधिकारी म्हणून समाजांत कॉलर तायट करून भोंवप्यांक समाजा खातीर कसलेंच काम करपाचें ना. समाज वयर येत जाल्यार तांचे म्हत्व उणें जातलें हाची भिरांत तांच्या मनांत आसा. तेच समाजाक विभागपाचो यत्न करतात अशें मंत्री गोविंद गावडे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
