भांगरभूंय | प्रतिनिधी
नवी दिल्ली, खबरां संस्था : भारतीय अंतराळ संशोधन संघटना (इस्रो) २१ ऑक्टोबराक गगनयान मोहिमेचें पयलें चांचणी उड्डाण करतलें. विज्ञान आनी तंत्रज्ञान मंत्री जितेंद्र सिंह हांणी ही म्हायती दिली.
चांचणी वाहन विकास उड्डाण (टीव्ही- डी १) आंध्र प्रदेशांतल्या श्रीहरिकोटाच्या सतीश धवन अंतरिक्ष केंद्रांत जातलें.
गगनयान मोहिमेची म्हायती दितना जितेंद्र सिंह हांणी सांगलें, हे चाचणेंत क्रू मॉड्यूल अंतरिक्षांत सोडप, तें परतून धर्तरेचेर हाडप आनी बंगालचे खाडींत टचडावन केल्या उपरांत तें परत मेळोवप हांचो आस्पाव जाता. गगनयान मिशनाच्या वेळार क्रू मॉड्यूल अंतरिक्षयात्रींक अंतरिक्षांत व्हरता.
मजगतीं, नौदळान खलाशी मॉड्यूल परत मेळोवपा खातीर मॉक ऑपरेशन सुरू केलां. खलाशी मॉड्यूला भायर टीव्ही- डी १ क्रू एस्केप सिस्टमचीय चांचणी जातली. ह्या मिशनांत कसलेय त्रास जाल्यार रॉकेटांतले अंतरिक्षयात्री सुरक्षीतपणान धर्तरेचेर कशे पावूंक शकतात हाची चांचणी करतले.
गगनयान मिशनांतल्यान इस्रोन फुडल्या वर्साचे सुरवातेक गगनयान मिशनाच्या पयल्या मनीसबळ नाशिल्ल्या मिशनाची येवजण आंखल्या. मनीसबळ नाशिल्लो मिशन खंयच्याच मनशाक अंतरिक्षांत धाडचो ना. मनीसबळ नाशिल्ल्या मिशनाच्या यशा उपरांत मनीसबळ मिशन येतलें, तातूंत मनीस अंतरिक्षांत धाडटले.
ह्यान पयलीं इस्रोन ८ ते १० ऑगस्ट मेरेन चंडीगढांत गगन मिशन खातीर ड्रॅग पॅराशूटाची येसस्वी चांचणी केल्ली. हें पॅराशूट अंतराळवीरांच्या सुरक्षीत लँडिंगा खातीर मदत करतलें. ताका लागून क्रू मॉड्यूलाचो वेग उणो जातलो तशेंच तें स्थीर उरतलें. ते खातीर चांचणे वेळार अंतरिक्षयात्रींच्या लँडिंगा सारकी परिस्थिती निर्माण जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
