भांगरभूंय | प्रतिनिधी
डिलायला लोबो हांचें आस्वासन
शिवोली: पर्यटकांची सतावणूक जायत आशिल्ल्या आसगांवच्या ‘वन वे’ रस्त्याची सक्ती काडून उडयतले अशें आस्वासन पत्रकारांनी विचारिल्ल्या प्रस्नाक शिवोलेची आमदार डिलायला लोबो हांणी दिलें.
मारना शिवोले आनी आसगांव ह्या दोन पंचायत वाठाराक जोडपी सोनार खिंड हांगा हो वादग्रस्त वन वे रस्तो आसा. आसगांव सावन शिवोले वटेन वचपी खूबशे वाहन चालक ह्या रस्त्यार फटवतात. दिशादर्शक फलक लायिल्लो आसून लेगीत खूबशे पर्यटक वन वे चो वापर करिनात. वन वेचो एकेरी मार्ग अशीर आसा. ताका लागून खूबशे वाहन चालक सरळ मार्गान रुंद रस्त्यान वतात. अशा वाहनांक दंड दिवपाक येरादारी पुलीस थंय सदांच उबे आसतात.
ह्या मार्गार पर्यटकांची व्हड प्रमाणांत गर्दी आसता. पर्यटक रेंट अ बायक, रेंट अ कार घेवन हणजूण, वागातोर, कळंगूट ह्या दर्यादेगांनी भोंवत आसतात. पर्यटक आपल्या मुडांत आसतना तांची नदर ह्या दिशादर्शक फलका कडेन वचना, आनी ते आयतेच पुलिसांचे तावडेंत सांपडटात.
हे खातीर खूबशा वाहन चालकांक आनी खास करून पर्यटकांक ताचो मोटो अर्थीक फटको बसता. आतां आमदारान आस्वासन दिल्ल्यान ही वन वे सक्ती केन्ना काडून उडयतले हाची वाट वाहन चालक पळयत आसात.
वादग्रस्त वन वे ची समस्या सोडोवपा खातीर वर्सा पयलींच सुचोवणी केल्ली. मदीं आशिल्लो भाग सपाट करून दोनूय रस्ते एक करपाचो प्रस्ताव आशिल्लो. हें काम करपाक थोडो वेळ लागतलो. पूण लोकांचे आनी पर्यटकांचे मागणे प्रमाण रोखडीच थंय वन वे सक्ती काडून उडोवपाचो यत्न करतले.
डिलायला लोबो, आमदार, शिवोली
आसगांवच्या वादग्रस्त वन वे जंक्शनाचेर येरादारी खात्यान दिशादर्शक फलक लायला. ताका लागून येरादारी पुलिसां कडल्यान कायद्या प्रमाण कारवाय जाता. हे खातीर येरादारी पुलिसांक दोश दिवप योग्य न्हय. थंय खरेंच वन वे ची गरज आसा? हो प्रस्न मोटो आसा. हो प्रस्न कायमचो सोडोवपाक वन वे ची सक्ती काडून उडयात.
गणेश शिरोडकार, हणजूण
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
