भांगरभूंय | प्रतिनिधी
पंचायतींचे सरपंच, पंच हांचे कडेन सादतले संवाद
पणजी: गोंयचे राज्यपाल पीएस श्रीधरन पिल्लई आयज (शेनवारा) ‘गोवा संपूर्ण यात्रा’ चो एक वांटो म्हूण साश्ट म्हालांतल्या बाणावली आनी वेळ्ळी मतदारसंघांक भेट दितले.
ते कारमोणा आनी सारझोरा हांगासरल्या ग्रामपंचायतींक भेट दितले. हांगा ते कोलवा, सुरावली, बाणावली, वार्का, कारमोणा, ओडली, केळशी आनी वेळ्ळी, आंबेली, चिंचोणें, असोळणें, सारझोरा, धर्मापूर, सां जुझे दी आरियल ह्या ग्रामपंचायतींचे सरपंच आनी पंच वांगड्यां कडेन संवाद सादतले. उपरांत ते डायलिसीस दुयेंतीक अर्थीक मजत करतले.
हे भेटी वेळार वेळ्ळीचे आमदार क्रुझ सिल्वा आनी बाणावलीचे आमदार कॅप्टन व्हेंझी व्हिएगश हे राज्यपालां बरोबर आसतले.
सकाळीं 10.30 वरांचेर राज्यपाल प्रार्थने खातीर कोलवा चर्चीक भेट दितले आनी उपरांत बाणावले नुस्तेमारां कडेन संवाद सादतले.
उपरांत राज्यपाल कारमोणा पंचायतीक भेट दिवन हांगा ते कोलवा, सुरावली, बाणावली, वार्का, कारमोणा, ओडली आनी केळशी ह्या ग्रामपंचायतींचे सरपंच आनी पंच वांगड्यां कडेन संवाद सादतले.
राज्यपाल दनपारां 3.15 वरांचेर चिंचोणेंच्या अवर लेडी ऑफ होप चर्चींत प्रार्थने खातीर भेट दितले. तेच बरोबर सारझोरेचे ग्रामपंचायतीक भेट दितले. हांगा ते वेळ्ळी, आंबेली, चिंचोणें, असोळणें, सारझोरा, धर्मापूर, सां जुझे दी आरियाल ह्या पंचायतींचे सरपंच आनी पंच वांगड्यां कडेन संवाद सादतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
