आमदार वा संस्था अध्यक्षाक काम करपाक 10 वर्सां तरी जाय: सभापती

स्कूल बशीचें उक्तावण केले उपरांत सभापती रमेश तवडकार, शांबा देसाय, रमाकांत नायक गांवकार, राजेंद्र देसाय आनी हेर.

भांगरभूंय | प्रतिनिधी

ई वाचनालयाचें आनी स्कूल बशीचें उक्तावण

काणकोण: आमदार आसूं वा खंयचेय संस्थेचो अध्यक्ष, विकासकामां करपाक ताका उण्यांत उणीं 10 वर्सांचो वेळ दिवंक जाय. खंयच्याय संस्थेच्या अध्यक्षाचो कार्यकाळ 2 वा 3 वर्सांचो आसता. हो कार्यकाळ ते संस्थेचे कार्य करपाक फावोसो नासता अशें काणकोणचे आमदार आनी सभापती रमेश तवडकार हांणी सांगलें.

चार रस्तो हांगासरल्या सेंत्रू प्रोमोतोर दी इन्स्त्रुसांव ह्या शिक्षणीक संस्थेक डॉ. अजीत देसाय हांणी 10 लाख रुपया खर्च करून ई वाचनालय दिलें. जाल्यार काणकोण पालिकेन 20 लाख रुपया खर्च करून स्कूल बस दिली. ह्या दोगांचेंय उक्तावण केले उपरांत तवडकार उलयताले.

ह्या वेळार माचयेर काणकोण पालिकेचे नगराध्यक्ष रमाकांत नायक गांवकार, मल्लिकार्जुन विद्यालयाच्या साबार बसकेचे अध्यक्ष राजेंद्र देसाय, कार्यकारिणीचे अध्यक्ष शांभा देसाय, उपनगराध्यक्ष नार्सिस्को फेर्नाडिस, नगरसेवक सायमन रेबेलो, हेमंत नायक गांवकार, सारा देसाय, अमिता पागी, लक्ष्मण पागी, पालक शिक्षक संघाचे अध्यक्ष अनील फळदेसाय, सतीश देसाय, सचीन देसाय, मुख्याध्यापिका वर्षा नायक, वर्षा नायक गांवकार, विहार देसाय हाजीर आशिल्ले.

काणकोणां आशिल्ल्या सगल्या शिक्षणीक संस्थांक म्हजें पुराय सहकार्य आसतलें. मल्लिकार्जुन विद्यालयाक वैभव मेळोवन दिवं. फुडल्या 10 वर्सांत काणकोण देशाच्या नकाशाचेर दिसतलो. काणकोणचो खंयचोच मनीस निरशेवचो वा हताश जावचो ना हाची जतनाय घेतले. समाजांतली नकारात्मकताय पयस करपाची गरज आसा अशें तवडकारान म्हणलें.

आयज कोणूय कोणाचेर टिका करता. जाची लायकी ना ते लेगीत प्रधानमंत्र्याचेर टिका करतात. शिक्षणीक संस्थांनी बरी सर्त जावंक जाय. शाळा खातीर केंद्र सरकाराच्यो विवीध येवजण्यो आसात ताचो फायदो घेवं. काणकोणां शिक्षणाची बरी परंपरा हाचे मुखारूय सुरू दवरूं अशें तवडकारान म्हणलें.

पालिका लेगीत खंयच्याय एका विद्यालयाक स्कूल बस दिवंक शकता. ही गोंयच्या इतिहासांतली पयली घडणूक. करदात्याच्या महसुलांतल्यानूच ही बस दिल्ल्यान करदात्यांनी आपल्या कराचो पयसो सार्थकी लागिल्ल्याचो अभिमान करदात्यांनी बाळगूंक जाय. सदर बस विद्यालयाक दिवपाचें थारायलें तेन्ना कांय नगरसेवकांनी विरोध केलो जाल्यार पालिकेच्या कामगारांनी लेगीत फाल्यांच्या पगाराचें कितें जातलें असो प्रस्न उपस्थीत केलो. अजून मेरेन पालिकेक तीन कोटी रुपयांचो कर रुपांत महसूल येवपाचो बाकी आसा. तो हाडपा खातीर पालिका अधिकारी आनी कर्मचाऱ्यांनी फुडाकार घेवचो अशें तांणी सुचयिल्ल्याचें नगराध्यक्ष रमाकांत नायक गांवकार हांणी सांगलें. हाचे मुखार कात्यानी बाणेश्वर आनी सेंट तेरेझा स्कुलाक लेगीत मजत करतले अशें नायक गांवकार हांणी सांगलें.

संस्थेक शंबर वर्सां पुराय जायत आसात. ते निमतान ज्या ज्या मनशांक उलो दिलो त्या त्या मनशांनी मजतीचो हात दिलो. विद्यालयांत खूबशे बदल केले. नव्यो इमारती बांदल्यो. त्यो बांदपा खातीर कोट्यांनी रुपयांचो खर्च जालो. तातूंतले कांय पयशे अजून दिवपाचे आसात. सगल्यांच्या सहकार्यानूच हांव रथ ओडूंक शकलों अशें भावना विवश जावन संस्थेचे अध्यक्ष शांबा देसाय हांणी सांगलें.

सुरवातेक फीत कापून आनी दिवली पेटोवन रमेश तवडकार हांणी स्कूल बशीचें आनी ई-वाचनालयाचें उक्तावण केलें. ह्या वेळार उल्हास पै भाटीकार, मेलव्हीन फेर्नांडीस हांणी शाळे संबंदी विचार व्यक्त केले. येवकार राजेंद्र देसाय हांणी दिलो. मानेस्तांक फुलोतरो दिलेशा धुरी, आयुषा कोमरपंत, गौरिका फळदेसाय, कृपा पागी हांणी भेटयलो. कार्यावळीचें सुत्रसंचालन मनोज नायक गांवकार हांणी केलें.