भांगरभूंय | प्रतिनिधी
बेतोडें पंचायतीचे ग्रामसभेंत घेतलो थाराव; खूबशे प्रस्न जाल्यात गंभीर
फोंडें: बेतोडें पंचायतीचे ग्रामसभेंत खूबशे प्रस्न थळाव्या आमदारा कडल्यान सोडोवपाचो निर्णय घेवन तांचे कडेन पत्रवेव्हार करतात. फाटल्या दोन-तीन वर्सांत खूबशे प्रस्न गंभीर जाल्यात. हातूंत उदक, वीज, रस्ते तशेंच हेर समस्यांचो आस्पाव आसा. पूण थळाव्या आमदारा कडल्यान पत्राची जाप मेळनाशिल्ल्यान निदान ग्रामसभेंत येवन ग्रामस्थांच्या प्रस्नांच्यो जापो दिवच्यो असो म्हत्वाचो थाराव आयतारा जाल्ले ग्रामसभेंत घेतलो.
बेतोडेंं पंचायतीचे सरपंच उमेश गावडे हांचे अध्यक्षताये खाला जाल्ले ग्रामसभेंत खूबशे थाराव घेतले. ह्या वेळार पंच वांगडी मधू खांडेपारकार, चंद्रकांत सामंत, दुर्गाप्रसाद वैद्य आनी हेर पंच वांगडी हाजीर आशिल्ले.
पंचायत वाठारांतल्या लोकांक खूबश्यो समस्या भेडसायत आशिल्ल्यान ग्रामसभेंत थाराव घेवन लेगीत विकास कामां जायनात. कितलेशेच फावटी थळाव्या आमदाराक समस्या सोडोवपा खातीर पत्र वेव्हार करपाचो निर्णय घेतात. पूण अजून मेरेन थळाव्या आमदारान धाडिल्ल्या पत्राच्यो जापो दिवंक नात. ताका लागून निदान वर्सांतल्यान एकदां तरी थळावे आमदार आनी उदका स्रोत मंत्री सुभाष शिरोडकार हांणी ग्रामसभेंत हजर रावपाचो म्हत्वपूर्ण थाराव ग्रामस्थांनी घेतलो.
सपना पार्क हांगासरल्या बेतोडें आनी कुर्टी पंचायत वाठाराचे शिमेर कुर्टी पंचायतीचे वटेन आशिल्ल्या घराचें घाणयारें उदक बेतोडें पंचायत वाठारांत रस्त्या वयल्यान व्हांवन वता. पावसांत हाचो अदीक त्रास बेतोडें पंचायत वाठारांतल्या लोकांक जाता. फाटल्या कितल्याशाच वर्सां सावन प्रस्न प्रलंबीत आसून भलायकी खातें, बांदकाम खातें आनी पंचायतीन जोडपणान पळोवणी करपाचो निर्णय ग्रामसभेंत घेतलो. तशेंच बेतोडें पंचायत वाठारांत वापर नाशिल्ली सरकारी मुळावी शाळा मोडून उडोवपा खातीर भाग शिक्षण खात्या कडेन निवेदन दिवपाचो थाराव ग्रामस्थांनी घेतला. वापर नाशिल्ले इमारतींत कांय भुरगीं खेळपा खातीर वचत आशिल्ल्यान घडये इमारतीचें पाखें कोसळपाची शक्यताय आसा.
फोंडें पालिकेच्या वाहनांतल्यान पंचायत वाठारांत कोयर उडयतात. पंचायती वतीन कांय दिसां पयलीं फोंडें पालिकेचें वाहन कोयर उडयत आसतना दिसून आयले उपरांत पालिके कडल्यान 5 हजार रुपयांचो दंड वसूल करून घेतिल्लो. पंचायत वाठारांत परतून कोयर उडोवचो न्हय हे खातीर पंचायती वतीन पत्र धाडपाचो निर्णय ग्रामस्थांनी घेतला.
तशेंच फोंडें पालिका आनी बेतोडें पंचायत वाठाराचे शिमेर आशिल्ल्या बोणबागांत फोंडें पालिकेच्या कोयराक उजो लायतात. प्लास्टीक कोयराक लायिल्ल्या उज्याक लागून वाठारांतल्या लोकांचे भलायकेक धोको निर्माण जाला. हे संबंदी लेगीत फोंडें पालिकेक पत्र धाडपाचो थाराव घेतला.
गवळवाड्यार कार्यरत आशिल्ल्या शिरोडें भलायकी केंद्राचें उपकेंद्रा लागीं आशिल्ल्या बंद विद्यालयाचे इमारतींत स्थलांतर करपाचो थाराव ग्रामसभेंत घेतला. पावसाच्या दिसांनी उपचारा खातीर येवपी दुयेंतींक भाड्याचे कुडी भायर सत्र्यो घेवन उबे रावचें पडटा. कूड ल्हान आशिल्ल्यान कर्मचार्यां सयत दुयेंतींची गैरसोय जायत आशिल्ल्यान बंद आशिल्ल्या विद्यालयाचे इमारतींत दुयेंतीची बरी वेवस्था जावं येता. ताका लागून भलायकी खात्या कडेन पत्र धाडपाचो निर्णय ग्रामसभेंत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
