भांगरभूंय | प्रतिनिधी
मुरगांव पालिकेच्या सगल्या प्रभागांनी कामां करतले: साळकार
वास्को: विकासकामां जावपा खातीर थळाव्या आमदाराचो तेंको आसप गरजेचें आसा. ते खातीर लोकांनी आमदाराचो समर्थक आशिल्ल्या मनशाक नगरसेवक, नगरसेविका म्हूण वेंचून हाडप गरजेचें आशिल्ल्याचें उलोवप मुरगांवचे नगराध्यक्ष लिओ रॉड्रिगीश हांणी केलें. कसलोच भेदभाव करिनासतना मुरगांव पालिकेच्या 25 प्रभागांनी विकासकामां करतले अशें वास्कोचे आमदार कृष्णा साळकार हांणी सांगलें.
प्रभाग 18 त विकासकामांचो शुभारंभ आमदार कृष्णा साळकार हांचे हस्तुकीं केलो. सुमार 22 लाख रुपया खर्च करून थंय कांय विकासकामां करतले. ह्या वेळार प्रभाग 18चे नगरसेवक अमेय चोपडेंकार, नगराध्यक्ष लिओ रॉड्रिगीश, नगरसेविका शमी साळकार आनी थळावे लोक हाजीर आशिल्ले.
मुरगांव पालिकेंत हाचे पयलीं विरोधांत आशिल्ल्या नगरसेवक, नगरसेविकांच्या प्रभागांनी विकासकामां जायनाशिल्लीं. पूण आतां चित्र बदल्लां. सगल्यांक समान न्याय दितना सगल्या प्रभागांनी विकास कामां जातलीं अशें साळकार हांणी सांगलें. आमदार निधी खाला आपणाक अडेज कोटी मेळटले. त्या निधीचो वापर सगल्या प्रभागांनी करतले. फुडल्या पांच वर्सांत आमकां खूबशीं विकासकामां करपाचीं आशिल्ल्याचें तांणी स्पश्ट केलें.
अनुदान, निधी मेळोवपा संबंदीची फायल्स हाता वेगळी करपा खातीर आमदाराच्या तेंक्याची गरज आसता. आमच्यो फायली सरकार पांवड्यार हातावेगळ्यो जावच्यो हे खातीर आमदार साळकार हांणी खूबशे कश्ट घेतले. तांकां लागून मुरगांव पालिकेच्यो फायली हातावेगळ्यो जावपाक मजत जायत आशिल्ल्याचें नगराध्यक्ष रॉड्रिगीश हांणी सांगलें. आमदार साळकार हांचो आमकां सदांच तेंको मेळत आशिल्ल्यान विकासकामांक चालना मेळत आशिल्ल्याचें तांणी सांगलें.
ह्या वेळार चोपडेंकार हांणी आपल्या प्रभागांत विकासकामां जायत आशिल्ले खातीर खोस उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
