भांगरभूंय | प्रतिनिधी
गांधी जयंती दिसा मुख्यमंत्र्यांचे जनतेक आवाहन
पणजी, प्रतिनिधी : सगळ्या धर्माचे लोक गुण्यागोविंदान नांदपी, अशें आमचें गोंय राज्य आसा. आपल्या धर्माच्यो सगळ्यांनी प्रार्थना करच्यो. आपल्या धर्माची प्रार्थना करता आसतना दुसऱ्या धर्माचो द्वेश करू नाकात, अशें आवाहन मुख्यमंत्री डॉ. प्रमोद सावंत हांणी केलां.
पोरण्या गोंयां महात्मा गांधी हांचे जयंतीचे कार्यावळी उपरांत ते उलयताले. महात्मा गांधी हांच्या पुतळ्याक फुलांचो झेलो घालून मुख्यमंत्र्यांनी गांधीजींक आर्गां ओंपलीं. राज्य पावंड्यावेली मुखेल कार्यावळ दरवर्सा प्रमाण पोरणे गोंयां जाली. हे वेळार आमदार राजेश फळदेसाय आनी हेर मानेस्त हाजीर आशिल्ले.
महात्मा गांधी हांणी सर्वधर्म समभावाची शिकवण दिल्या. तांचे जयंती दिसा तांचे शिकवणीक पालव दिवपाक जाय. हीच गांधीजींक खऱ्या अर्थान आदरांजली थारतली. अंत्योदय, ग्रामोदय आनी सर्वोदय ह्या तत्वांचेर सरकार वावर करता. हालींच्या दिसांनी दुसऱ्या धर्माचो द्वेश करपी पोस्ट समाज माध्यमांचेर घालपाचो वावर सेगीत सुरू आसा. दुसऱ्या धर्माचो द्वेश करपी पोस्ट सरकार सहन करचो ना. तांचेर खर कारवाय जातली. आपल्या धर्माच्यो सगळ्यांनी प्रार्थना करच्यो. दुसऱ्या धर्मांचो दुस्वास करचो न्हय. सगळ्या गोश्टींचें राजकारण करपाची संवय कांय जाणाक जाल्या. राज्याचे उदरगती खातीर सगळ्यांचें सहकार्य गरजेचें आसा, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
