आदिवासी समाजा खातीर हांवें केल्लें कार्य सगल्यांक खबर आसा: तवडकार

संकल्प दिसाचे कार्यावळींत उलयतना सभापती रमेश तवडकार. कुशीक हेर.

भांगरभूंय | प्रतिनिधी

काणकोण: आदिवासी समाजा खातीर हांवें केल्लें कार्य सगल्यांक खबर आसा. हांवें आनी आदर्श युवा संघान समाजा खातीर दिल्लें योगदान म्हणल्यार उक्तें पुस्तक. संकल्प दिसा निमतान मंगेश गांवकार आनी दिलीप वेळीप ह्या हुतात्म्यांचे यादी खातीर ट्रस्ट स्थापन करून शिक्षण आनी रोजगार उपलब्ध करून दिवपाचो विचार आसा, अशें आदिवासी फुडारी आनी सभापती रमेश तवडकार हांणी सांगलें.

आदर्श युवा संघ गांवडोंगरी, खोतीगांव आनी श्री बलराम शिक्षणीक संस्था, आमोणें, पैंगीण हांच्या जोड पालवान बिरेस्तारा स. मंगेश गांवकार आनी स. दिलीप वेळीप हांचे यादी खातीर आयोजीत केल्ल्या संकल्प दीस कार्यावळींत ते उलयताले.

ह्या वेळार माचयेर उपजिल्होधिकारी रमेश गांवकार, संघाचे कार्यकारी अध्यक्ष अंकूश गांवकार, खोतीगांवचे सरपंच आनंदू देसाय, पैंगीणचे सरपंच सविता तवडकार, ओबीसी म्हासंघाचे राष्ट्रीय अध्यक्ष मधू नायक, अनुजाती आणि जमातीचे अध्यक्ष दीपक करमरकार, जि.प. वांगडी सुरेश केपकार, संघाचे सचीव जानू तवडकार, मोर्चाचे अध्यक्ष प्रभाकर गांवकार, कृष्णा वेळीप, धाकू मडकयकार, पंच वांगडी वृंदा गांवकार आदले सरपंच गणेश गांवकार आनी हेर मानेस्त हाजीर आशिल्ले.

सुरवातेक जानू तवडकार हांणी येवकार दिलो. ह्या वेळार स. मंगेश गांवकार तशेंच स. दिलीप वेळीप हांच्या फोट्याक फुलांहार घालून तांकां आर्गां ओंपलीं.

ह्या वेळार सुरेश केपकार, दीपक सरमळकार, मधू नायक हांचीं उलोवपां जालीं. सुत्रसंचालन संजय तवडकार जाल्यार दामोदर वेळीप हांणी उपकार मानले.