भांगरभूंय | प्रतिनिधी
जुवारी पुलार येरादारी पुलिसांचो एका दिसाचोच देखावो
वास्को: जुवारी पुला वयल्या अवजड वाहनां खातीर आशिल्ले लेनीचो वापर हेर वाहनांनी केल्यार दंडात्मक कारवायेक सामकार वचचें पडटलें अशे शिटकावणी दिवन सुमार 250 वाहन चालकां कडल्यान दंड वसूल केलो. पूण उपरांत थंयचे येरादारी पुलीस अधिकारी, शिपाय गायब जाल्ल्यान ते लेनी वयल्यान चारचाकी, दुचाकी वाहनां गतीन धांवत आशिल्ल्याचें दिसून येता. ताका लागून तो एका दिसाचो देखावो आशिल्लो काय कितें अशी प्रतिक्रिया लोक उक्तावंक लागल्यात.
ह्या पुलार एक लेन अवजड वाहनां खातीर राखून ती उक्ती दवरल्या. ते लेनींतल्यान पणजे सावन मडगांवां वचपी अवजड वाहनां वतात. हेर वाहनांक हे लेनी वयल्यान वचूंक बंदी आसा. पणजे सावन येवपी हेर वाहनांक पोरण्या जुवारी पुलाचो वापर करूंक जाय. पूण मदेकांत थंय कोणाचो पायपोस कोणाक नाशिल्ल्यान पणजे सावन मडगांवां वचपी अवजड वाहनांचे लेनी वयल्यान हेर हलकी वाहनां सुसाट वचत आशिल्ल्याचें दिसून येता.
थंय फलक लावन लेगीत कोणूच त्या फलकाची दखल घेना. थंय बॅरिकेड्स उबारल्यात. पूण ते सोबेचेच थारल्यात. 23 मे दिसा थंय येरादारी नियंत्रणा खातीर उबो आशिल्ल्या होम गार्डाक मोटारीचो धपको बशिल्ल्यान येरादारी पुलीस खडबडून जागे जाले. थंय येरादारी पुलीस अधिक्षक बोस्युएट सिल्वा जातीन हजर जाले. तांणी स्वता पुलार उबे रावन जीं वाहनां अवजड लेनी वयल्यान येतालीं तीं आडावपाक सुरवात केली. त्या वाहन चालकां कडल्यान येरादारी पुलिसांनी दंड वसूल केलो. हे कारवायेक लागून पुलिसांची तोखणाय जाली. ह्या वेळार जो मेरेन वाहन चालक नेमांची योग्य अंमलबजावणी करिनात तो मेरेन कारवाय सुरूच उरतली अशी घोशणाय जाल्ली. पूण त्या दिसा उपरांत ती घोशणा वाऱ्यार हुबून गेल्ल्याचें दिसून येता.
जुवारी पुला वयल्यान पणजे सावन मडगांवां वचपी अवजड वाहनां खातीर राखून दवरिल्ल्या लेनी वयल्यान आतां पयलीं भशेन हेर वाहनांची येरादारी सुरू जाल्या. तांचे आड कारवाय करपा खातीर येरादारी पुलिसूच नात. ताका लागून 23 मे दिसा जाल्ली कारवाय हो एका दिसाचो देखावो आशिल्लो काय कितें अशी प्रतिक्रिया उक्तायतना दिसून येता. घडये आनीक एका अपघाताची वाट येरादारी पुलीस पळयतात आसतले. तो अपघात जालो की जुवारी पुलार उबे रावन कारवाय करतले आनी परतून सदचे भशेन सुरू जातलें अशी प्रतिक्रिया लोक उक्तावंक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
