भांगरभूंय | प्रतिनिधी
चालकां आड कारवाय; झुआरी पुलार वाहनांची एकूच गर्दी
एटीएस कमांडोच्या वाहन चालकाकूय तालांव
वास्को: नव्या झुआरी पुला वयल्यान अवजड वाहनां खातीर आशिल्ले लेनींतल्यान येरदारी करपी हेर वाहन चालकां आड येरादारी पुलीस अधिक्षक बाॅस्युएट सिल्वा आनी वास्को येरादारी पुलिसांनी काल (मंगळारा) सकाळीं कारवाय केली. ताका लागून थंय एकूच बोवाळ जालो. आडायिल्ल्या शेंकड्यांनी वाहनधारकां मदीं खूबशा जाणांनी आपले चुकीची कबुली दिली. पूण दंडात्मक कारवाये पसून कोणाचीच सुटका जाली ना. मजगतीं, गोवा पुलिसांच्या एटीएस कमांडोच्या वाहनचालकाक दंड भरचो पडलो.
नव्या झुआरी पुलाचो एक भाग येरादारी खातीर उक्तो केला. ह्या पुला वयल्यान पणजे वचूं येता. तशीच एक लेन पणजी सावन येवपी अवजड वाहनां खातीर राखीव दवरल्या. पणजी सावन मडगांव, वास्को वटेन वचपी हेर वाहनां खातीर पोरणो झुआरी पूल वापरतात. हे संबंदी योग्य ती अधिसुचोवणी काडून वाहन चालकां मदीं जागृताय केल्ली. पूण पणजे सावन मडगांवां वचपी खूबशे वाहन चालक पोरण्या पुलाचो वापर करचे बदला अवजड वाहनां खातीर राखीव दवरिल्ले लेनीचो वापर करून येरादारी नेमांचें उल्लंघन करूंक लागल्यात.
मंगळारा सकाळीं जाल्यार तेंगशीच गांठली. हे लेनींतल्यान वचपी एका वाहनान थंय येरादारी नियंत्रणा खातीर आशिल्ल्या गृहरक्षकाक धपको दिलो. ही म्हायती मेळटकूच अधिक्षक बाॅस्युएट सिल्वा, वास्को येरादारी पुलीस निरिक्षक शैलेश नार्वेंकार आनी हेर पुलीस झुआरी पुलार पावले.
तांणी अवजड वहनांचे लेनींतल्यान येरादारी करपी हेर वाहनांक कुठ्ठाळीचे वटेन आडावपाक सुरवात केली. ताका लागून खूबशे वाहन चालक पुलिसांचे तावडेंत सांपडले. कांय जाणांनी आमी पयलेच फावटी ह्या पुला वयल्यान येतात, आमी येरादारी नेमांचो फलक पळयलो ना, पुलाचे दुसरे वटेन येरादारी पुलीस कित्याक दवरले ना बी अशे उलोवंक लागले. पूण दंडा पसून कोणाचीच सुटका जाली ना.
गोंय पुलीस एटीएस कमांडोचें वाहन लेगीत ते लेनी वयल्यान आयले उपरांत सिल्वा हांणी तें वाहन आडावन वानचालकाक समज दिवन दंड फारीक करपाक सांगलें. ‘कायदो सगल्यांक सारको’ अशें तांणी हाजीर आशिल्ल्या पत्रकारांक सांगलें. जो मेरेन हेर वाहन चालक अवजड वाहनां खातीर राखीव दवरिल्ले लेनींतल्यान येरादारी करप बंद करिनात तो मेरेन ही कारवाय चालूच उरतली अशें शैलेश नार्वेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
