भांगरभूंय | प्रतिनिधी
मडगांव: राय आनी सां झुजे दी आरीयाल हांगा गोंय कृशी धोरणा संबंदी म्हायती दिवपी सेमिनार घेतलो. ह्या वेळार गोंयचे फुडले पिळगे खातीर संस्थेचे संयोजक जॅक मारस्कारेन्हास हांणी गोंयच्या कृशी मळार वाड जावपा खातीर गोंय सरकाराच्या अर्थसंकल्पाचे निधींत आनीक वाड जावची अशी मागणी केली. तशेंच पर्यटनाक गरजेचीं कृशी उत्पादनां गोंयांत उत्पादीत जावपा खातीर शेतकारांनी यत्न करीत रावचें अशें आवाहन केलें.
रायचे शेतकार आनी सां जुझे दी आरीयाल पंचायती वतीन वाठारांतल्या शेतकारां सयत बागायतदार आनी हेर घटकां खातीर मार्गदर्शन कार्यावळ आयोजीत केल्ली. ह्या वेळार संस्थेचे जॅक मास्कारेन्हास हांणी सांगलें, कृशी धोरण हे फक्त शेतकारां खातीर म्हत्वाचें ना जाल्यार कृशी उत्पादनाचेर आदारीत सर्वसामान्य लोकां खातीरूय म्हत्वाचें आसा. ह्या धोरणाचेरूच गोंयच्या फुडाराची वळख आनी गोंयच्यो जमनी राखून दवरपाची जबाबदारी आयल्या. वाडिल्लें पर्यटन आनी शारीकरणाची वाडिल्ली गती ह्या गजालींक लागून गोंयच्यो शेतजमनी राखून दवरपाचें व्हड आव्हान शेतकारां मुखार उबें रावलां अशें मास्कारेन्हास हांणी म्हणलें.
कृशी क्षेत्रांतल्या उत्पन्नाचें प्रमाण वाडलें ना जाल्यार ताचो परिणाम शेतकारांच्यो जमनी पडींग उरपाचेर जायत आसा. गोंयांत 80 लाखां परस चड पर्यटक येत आशिल्ल्याचें सरकार सांगता. ते प्रमाण पर्यटकां सयत गोंयांत गरजेचीं जिणेआवश्यक उत्पदकां पिकोवपाची तांक गोंयांत शेतकारां मदीं येवपाची गरज आसा अशें मास्कारेन्हास हांणी म्हणलें.
भाजी, दूद, मास, नुस्तें अशीं उत्पादनां हेर राज्यांतल्यान आयात करप बंद जावपाची गरज आसा. गोंयांत फावो तें उत्पादन जायत जाल्यार हें शक्य आशिल्ल्याचें तांणी म्हणलें. ते खातीर मुळाव्यो सुविधा, तंत्रज्ञान, गरजेचें अनुदान आनी प्रोत्साहन मेळपाची गरज आसा. ते खातीर गोंयच्या अर्थसंकल्पांतले निधींत आनीक वाड जावची अशी आस्त मास्कारेन्हास हांणी उक्तायली.
आमांसिओ हांणी सांगलें, पर्यटन धोरणांतले त्रुटीक लागून गोंयांत कसिनो, घुंवळे वखदां, शिंदळकी ववसायांनी वाड जाल्या. कृशी धोरणा विशीं अशें जावचे न्हय हे खातीर थळाव्या उत्पादनांक गरजेचें मार्केट उपलब्ध जावपा खातीर सेंद्रीय शेतां कडेन लक्ष दिवपाची गरज आसा. गोंयांत आयात खाद्यपदार्थाची योग्य तपासणी जावपाची आनी गोंयांत उत्पादीत बरें खाद्य उपलब्ध जावपाची जबाबदारी घेवन उत्पादनांत वाड जावपाची गरज तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
