भांगरभूंय | प्रतिनिधी
म्हापशें: इन्स्टाग्रामाचेर इश्टागत करून बरी जीण जगपाचें हांयस दाखोवन आनी घरांतल्यान भांगराच्यो वस्ती हाडपाक प्रवृत्त करून दोगां सान पिरायेच्या चलयांचें अपहरण केलें. ह्या प्रकरणांत कोलवाळ पुलिसांनी हुबळी पुलिसांच्या आदारान दोगां दुबावितांक हुबळी सावन अटक केली.
पुलिसांनी तौसीफ किल्लेदार उर्फ मुन्ना (20) आनी नावेद अहमद पानीबंद (19) ह्या दोगां हुबळीच्या दुबावितांक अटक केली.
सोमार 29 मे दिसा कोलवाळ पुलीस स्टेशनाचे शिमेंतल्यान 12 आनी 15 वर्सां पिरायेच्या चलयांक फूस लावन पळोवन व्हेल्ल्याचाे प्रकार घडिल्लाे. ह्या प्रकरणांत दोनूय पिडीत चलयांच्या कुटुंबांच्या कागाळी वयल्यान पुलिसांनी वेगळेवेगळे अपहरणाचे गुन्यांव नोंद केल्ले.
मजगतीं, पिडीत चलयो हुबळीत आशिल्ल्याची म्हायती पुलिसांक मेळ्ळी. ते प्रमाण पुलीस हुबळी गेले आनी दुबावितांचो सोद घेतलो. दुबावितांनी दोनूय चलयांचे अपहरण करून तांकां एके कुडींत बंदिस्त दवरिल्ले. कसबापेठ-हुबळी पुलिसांच्या सहकार्यान कोलवाळ पुलिसांनी दोनूय चलयांची सुटका केली आनी दुबावितांक अटक केली.
मजगतीं, दुबावीत तौसीफ किल्लेदार हाची इन्स्टाग्रामार 15 वर्सां पिरायेचे पिडिते कडेन वळख जावन ताचे रुपांतर इश्टागतींत जालें. उपरांत दुबावीत पिडितेक मेळपा खातीर गोंयांत येतालो. उपरांत दुबावितान बरी जीण जगुया अशें सांगून पिडितेक हुबळी आपयलें. घरांतल्यो भांगराच्यो वस्ती आनी हेर मोलादीक वस्तू आपले बरोबर घेवन येवपाक ते चलयेक प्रवृत्त केलें.
ह्या प्रकरणांत 12 वर्सा पिरायेचे पिडितेक वयर दिल्ले इश्टीणीन प्रियकरा विशीं सगली म्हायती सांगिल्ली. ताका लागून ती लगीत हुबळी वचपाक तयार जाली. दोगांनीय आपल्या घरांतल्यो दोन भांगराच्यो सरपळी, दोन मुदयो, कानांतलीं आनी पैंजण अशें भांगर घेतलें. दोगांय हुबळी पावतकूच दुबावीत तौसीफ हाणे दोनूय पिडितांक दुबावीत नावेद अहमद पानीबंद ह्या आपल्या इश्टाच्या टिप्पूनगर, नेकरनगर रस्तो हुबळी-धारवाड हांगा एके कुडींत दवरली.
पुलिसांनी पयली तौसीफ उर्फ मुन्ना ह्या दुबाविताक अटक केली आनी पिडितांची सुटका केली आनी उपरांत दुसऱ्या दुबाविताक धरलो. दोगांनीय आपल्या गुन्यांवाची कबुली दिली. दुबावितांनी उपरांत पिडितां कडल्यान भांगर, रुप्याच्यो वस्ती हुबळीतूच एका थळाव्या शेटीक विकिल्लें. ते भांगरूय पुलिसांनी जप्त केलें.
पुलीस अधिक्षक निधीन वाल्सन, उपअधिक्षक जिवबा दळवी, निरिक्षक सोमनाथ माजीक हांच्या मार्गदर्शना खाला उपनिरिक्षक मंदार परब हांच्या फुडारपणा खालच्या पंगडान ही कामगिरी केली.
उपअधिक्षक जिवबा दळवीन म्हणलें, ह्या प्रकरणांत कोलवाळ पुलिसांनी भादंसंच्या 363 आनी गोंय बाल कायदो कलम 8 प्रमाण गुन्यांव नोंद केला. पुलिसांनी 48 वरां भितर तपास लायलो. दोनूय पिडीत सुखरूप आसून तांची वैजकी चांचणी करतले. हातूंत पिडितांचेर लिंगीक अत्याचार जाल्ल्याचें मुखार आयलें जाल्यार दुबावितां आड अतिरिक्त कलमां जोडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
