अपघात विरोधी यंत्रणा बसयतकूच गतीन धांवपी रेल्वे सुरू करच्यो: फ्रान्सीस सार्दीन

भांगरभूंय | प्रतिनिधी

कोंकण रेल्वे मार्गार अपघात विरोधी यंत्रणा बसयिल्ली ना: घाटगे

मडगांव: दक्षीण गोंयचे खासदार फ्रान्सीस सार्दीन हांणी ओडिशांतल्या रेल्वे अपघाताचो दाखलो दिवन कोंकण रेल्वे मार्गार अपघात विरोधी यंत्रणा वा हेर गॅझेट बसयले बगर गतीन धांवपी रेल्वे सुरू करच्यो न्हय अशी मागणी रेल्वे प्रशासना कडेन केल्या.

मजगतीं, कोंकण रेल्वेच्या रोहा सावन ठोकूर मेरेनच्या विभागांत कसलेच तरेची अपघात प्रतिबंधक यंत्रणा बसयिल्ली ना. पूण कोंकण रेल्वे मार्गार रेल्वेच्या सुरक्षीतताये विशीं रुळाची देखभाल दुरुस्ती आनी हेर कामां वेळावेळार करतात अशी म्हायती कोंकण रेल्वे प्रशासनान दिली.

सार्दीन हांणी मुखार म्हणलें, ओडिशांतल्या रेल्वे अपघातांत 250 परस चड प्रवाशांक मरण आयलां. ह्या अपघातांत मरण आयिल्ल्या मनशांक केंद्र सरकारा कडल्यान 10 लाख रुपयांची अर्थीक मजत जाहीर केल्या. जाल्यार जखमींक 2 लाखांची अर्थीक मजत दिवपाची घोशणा केल्या.

मरण आयिल्ल्या मनशांच्या कुटुंबांक जे प्रमाण 10 लाख रुपयांची मजत दितले, तेच प्रमाण जांचे हात, पांय वा एखादो अवयव अपघातांत निकामी जाल्लो आसत जाल्यार ताची पुराय जीण विकलांग जाल्ल्यान तांकांय 10 लाखांची मजत करची अशी मागणी खासदार सार्दीन हांणी केली.

तशेंच रेल्वे हें म्हत्वाचें खातें आशिल्ल्यान रेल्वे मंत्री अश्विनी वैष्णव हांचे कडेन फक्त रेल्वेचें एकूच खातें दिवचें आनी तांचे कडल्यान देशांतल्या रेल्वेच्या सुरक्षीतताये खातीर गरजेच्यो त्यो उपाय येवजण्यो करच्यो अशेंय सार्दीन हांणी म्हणलें.

मजगतीं, कोंकण रेल्वेचे वरिश्ठ जनसंपर्क अधिकारी तशेंच उपप्रबंधक बबन घाटगे हांचे कडेन संपर्क सादलो तेन्ना कोंकण रेल्वे मार्गार अपघात विरोधी यंत्रणा बसयिल्ली ना. तशेंच हे विशीं कोंकण रेल्वे प्रशासना कडल्यान कसलोच प्रस्ताव धाडून दिल्लो ना अशेंय स्पश्ट केलें.

पूण कोंकण रेल्वेंतल्यान प्रवास करपी प्रवाशांचे सुरक्षीतताये खातीर रेल्वेच्या रुळांची वेळावेळार तपासणी आनी देखभाल दुरुस्ती करतात अशेंय घाटगे हांणी सांगलें. सेमीस्पीड आशिल्ल्या वंदे भारताचो शुभारंभ लांबणेर पडला. हे फाटभुंयेर खासदीर सार्दीन हांचें उलोवप म्हत्वाचें थारतलें.

ओडिशांत जाल्ल्या रेल्वे अपघातांत 250 परस चड लोकांक मरण आयलां. गोंयांत दोन मरणां लेगीत परवडचीं नात ना. अपघात जावचो न्हय हे खातीर रेल्वे मार्गार गरजेची उपाय येवजण करची. अपघात विरोधी यंत्रणा बसयले उपरांत गोंयांत गतीन धांवपी रेल्वे सुरू करच्यो अशें खासदार फ्रान्सीस सार्दीन हांणी म्हणलें.