भांगरभूंय | प्रतिनिधी
सेहझीन शेखः वाळपय पालिके वतीन रस्तो सुरक्षा सप्तक
रस्त्यार अपघात आडावपाचे आसल्यार सगल्यांनी सुरक्षेचे कायदे पाळपाची गरज आसा. सगल्यांनी हॅल्मेट घालचें. गरजेचीं कागदपत्रां तुमचे कडेन दवरात. कायद्याचें उल्लंघन जावचें न्हय हाची जतनाय सगल्यांनी घेवची. हे सगले नेम पाळ्ळ्यार रस्त्यार जावपी अपघातांचेर व्हड प्रमाणांत नियंत्रण दवरूं येता. तेच प्रमाण ज्यो आडमेळीं आसात थंयच्या रस्त्यांचेर सरकारान खाशेलें लक्ष दिवप तितलेंच म्हत्वाचें अशें वाळपयची नगराध्यक्षा सेहझीन शेख हांणी म्हणलें.
रस्तो सुरक्षा सप्तका निमतान वाळपय नगरपालिकेन वाठारांत जनजागृताय केली. जे हॅल्मेट घालिनात ते संबंदीं सुरक्षेचे नेम पाळचे अशें सांगपी पत्रकां वांटलीं. वाळपय शाराच्या मध्यवर्ती सुवातेर ही कार्यावळ आयोजीत केल्ली.
ह्या वेळार पालिकेचे उपाध्यक्ष शेख फैजल, नगरसेवक विनोद हळदणकार, वासियुद्दीन सैय्यद, नगरपालिका अभियंतो जयेश कळंगूटकार आनी पालिकेचे हेर कर्मचारी हाजीर आशिल्ले.
ह्या वेळार उलयतना नगराध्यक्षा सेहझीन शेख हांणी म्हणलें, सरकार लोकजागृताय करता, पूण ताची अंमलबजावणी सगल्यांनी करूंक जाय. सगल्यांचें जिवीत म्हत्वाचें. पूण ह्या जिविताची जतनाय घेवप ही सगल्यांची जापसालदारकी. ह्यो गजाली दुसऱ्यांक सांगून शक्य जायनात. ते खातीर स्वताक बदलप खूब गरजेचें. सान पिरायेच्या भुरग्यांक वाहनां दिवप हो गंभीर गुन्यांव. हे संबंदी सरकार वेळावेळार आवाहन करता. पूण पालक हाची दखल घेनात ही सामकी गंभीर गजाल. पालकांनी अशा गजालीं कडेन लक्ष दिल्यार रस्त्यार जावपी अपघातांचेर व्हड प्रमाणांत नियंत्रण दवरूं येता. पूण हे खेपे पालकांनी चड सादूर रावप गरजेचें आसा अशें तांणी स्पश्ट केलें.
वाळपय पालिके वतीन लोक जागृताय निर्माण करपा खातीर शाराच्या मदेकांत पत्रकां वांटलीं. हॅल्मेट घालूंक नाशिल्ल्यांक पत्रकां दिवन दुसरे खेपे हॅल्मेट घालिनासतना गाडी चलोवची न्हय अशी विनंती केली. ह्या वेळार दिवचल येरादारी खात्याचे पुलीस हाजीर आशिल्ले.
हे विशीं आपली प्रतिक्रिया उक्तायतना अभियंतो जयेश कळंगूटकार हांणी म्हणलें, गाडी चलयतना सगल्यांनी जतनाय घेवपाची गरज आसा. गतीन वचप सगल्यां खातीर आनी हेरांक घाताचें. सुरक्षेचे नेम पाळप हें सगल्यांचें कर्तव्य, आनी ते संबंदी हेरांक जागृत करप ही दरेकल्याची जापसालदारकी.
उपनगराध्यक्ष शेख फैजल हांणी म्हणलें, पालिकेन आयोजीत केल्ल्या लोकजागृताये वरवीं वाहन चालकां मदीं जागृताय निर्माण करपाक मजत करतले. पूण दरेका पालकांनी आपल्या भुरग्यां विशीं खाशेली जतनाय घेवप तितलेंच म्हत्वाचें. सरकार लोकां मदीं जागृताय करून दंडात्मक कारवाय करता. पूण स्वता मदीं बदल जाय मेरेन अश्यो गजाली शक्य नात अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
