भांगरभूंय | प्रतिनिधी
भांगरभूंय । प्रतिनिधी
बेळगांव- फोंडेंः उत्तर कन्नड जिल्हाच्या उपायुक्तान एनएच 748 (एनएच 4 ए)च्या अनमोड- रामनगर रस्त्यार अवजड वाहनांक घातिल्ली बंदी फाटीं घेवन ती परत सुरू केल्या. ते संबंदीचो आदेश उपायुक्त प्रभूलींग कवळीकट्टी हाणे मंगळाराक काडलो. व्हो आदेश रोखडोच लागू जातलो. ताका लागून गोंय,कर्नाटक, महाराष्ट्र आंध्र प्रदेश आनी तमिळनाडू राज्यांतल्या मल्टि-एक्सल वाहन धनयांक थाकाय मेळ्ळ्या.आतां ह्या घाटांतल्यान सगळे तरेची येरादारी परत सुरू जातली. ताका लागून बुधवारच्यान येरादारीची वर्दळ वाडपाची शक्यताय आसा.
कर्नाटकाचो आदलो मंत्री आनी हल्ल्याळचो नवनिर्वाचीत काँग्रेस आमदार आर व्ही देशपांडे हाणे आदेश दिल्ल्यान अनमोड घाटांतलो रस्तो अवजड वाहनांक उक्तो करपाचो निर्णय जिल्हो प्रशासनान घेतलो. व्हो रस्तो येरादारीक बंद केल्ल्यान माल येरादारी करपी वाहनांत चड अतंर कापून बेळगांव आनी हेर कडेन वच्चें पडटालें. ताका लागून चड डिझेल लागता ह्या कारणान घाटांतल्यान अवजड वाहनां व्हरपाक दिवचीं अशी मागणी कर्नाटक आनी गोंयांतल्या तशेंच हेर राज्यांतल्या अवजड वाहन धनयांनी केल्ली. तांची जी गैरसोय जाता ती मतींत घेवंन उपायुक्ताक रस्तो उक्तो करपाक आपणे सांगलें अशें आमदार देशपांडे हांणे भांगरभूंयक सांगलें.
फाटल्या चार वर्सा सावन रस्तो सारको करपाक खातीर म्हणून रामनगर-अनमोड रस्तो अवजड वाहनांक बंद केल्लो. 52 किलोमीटर लांब खानापूर-अनमोड व्हाया लोंढा रस्त्याचें बांदकाम कोरोना म्हामारीक लागून तशेंच पर्यावरणवाद्यांनी केल्ले याचिकेक लागून बंद पडिल्लें. ताका लागून अवजड येरादारीची व्हडा प्रमाणांत गैरसोय जाताली.
अनमोड घाट मार्ग येरादारीक उक्तो केल्ल्यान अवजड वाहन धनयांनी खोस उक्तायल्या. बेळगांव आनी ताच्या फुडें वचपी अवजड वाहनांक कारवार, हल्ल्याळ मार्गान वचपा खातीर सुमार 100 किलोमीटर अंतर कापून वच्चें पडटालें. ताका लागून थारायल्ले कडेन वचपाक तांकां वेळ लागतालो तशेंच डिझेलाचेर चड खर्च करचो पडटालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
