भांगरभूंय | प्रतिनिधी
पावस पडत जाल्यार आनीक पालसणां कोसळपाची शक्यताय
फोंडें: अनमोड घांटांत सोमारा रातीं कोसळिल्लें पालसण कुशीक काडपाचें काम काल (मंगळारा) सकाळ सावन सुरू केलें. सोमारा रातीं पालसण कोसळिल्ल्याची म्हायती मेळ्ळे उपरांत कुळें पुलीस आनी फोंडें उजो पालोवपी दळाच्या कर्मचाऱ्यांनी घडणूक थळार धांव घेवन रस्त्या वयलीं झाडां कुशीक काडून येरादारी सुरळीत केल्ली.
अनमोड घांटांत पावसाच्या दिसांनी अदीं मदीं पालसणां कोसळपाच्यो घडणुको घडत आसतात. सोमारा रातीं दुदसागर देवळा कुशीक सुमार 200 मिटर अंतराचेर आशिल्लें पालसण कोसळ्ळें. पालसण कोसळिल्ल्याची म्हायती मेळटकूच उजो पालोवपी दळ आनी कुळें पुलिसांनी घडणूक थळार धांव घेतली. रातच्या वेळार माती कुशीक काडप शक्य नाशिल्ल्यान रस्त्यार पडिल्लीं झाडां कुशीक काडून राष्ट्रीय म्हामार्गा वयली येरादारी सुरळीत केली. मंगळारा सकाळीं जेसीबीच्या आदारान माती काडपाच्या कामाक सुरवात केली. ह्या वेळार कुळें पुलीस आनी बांदकाम खात्याचे कर्मचारी घडणूक थळार वचून येरादारी सुरळीत करपा खातीर सहकार्य केलें.
अनमोड घांटांत फाटल्या म्हयन्यांत लेगीत दोन कडेन पालसणां कोसळपाचे प्रकार घडल्यात. ते खातीर कांय वेळ गोंय-बेळगांव मार्गा वयली येरादारी ठप्प जाल्ली. सोमारा रातीं कोसळिल्ल्या पालसणा कुशीचो कांय भाग कोसळपाच्या मार्गार आसा. सेगीत पावस पडत जाल्यार हें पालसण लेगीत कोसळूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
