भांगरभूंय | प्रतिनिधी
पणजी : वर्सा प्रमाण अंदूं सुद्दा सनबर्न महोत्सव 28 ते 31 डिसेंबर ह्या चार दिसांनी वागातोरा जातलो. अंदूंच्या महोत्सवांत गोंयच्या कार्यावळीं खातीर खासा गोंयचो फांटो आसतलो. देश, विदेशांतले कलाकार ह्या महोत्सवांत वांटेकार जातले.
अंदूं सनबर्न जातलो. सनबर्नाचें स्वरूप वेगळें आसतलें अशें पर्यटन मंत्री रोहन खंवटे हांणी स्पश्ट केल्लें. सनबर्न आयोजकांची थकबाकी दिवपाची आसली तरी गोंय सरकारान तत्वता सनबर्नाक मान्यताय दिल्या, अशी म्हायती गोपांनी दिली.
दर वर्सा डिसेंबर सोंपपाक सनबर्न महोत्सव जाता. महोत्सवांत खासा करून संगिताच्यो कार्यावळी जातात. वर्स सोंपून नव्या वर्साक येवकार दिवपा खातीर खूबशे पर्यटक गोंयांत येतात. न्यू इयराक विदेशी पर्यटकांचाे आंकडो मोठो आसता. हाका लागून सनबर्नाक बरीच गर्दी जाता. पर्यटनाक उर्बा मेळपा हेतान सनबर्नाक गोंय सरकार परवानो दिता. सनबर्नाक लागून वागातोर सयत दर्यादेग वाठारांत येरादारीची कोंयडी जाता. हाका लागून येरादारी पुलिसांक येरादारीचो स्वतंत्र आराखडो करचो पडटा.
कोरोना म्हामारी वेळार सनबर्न महोत्सव जावंंक नासलो. कोरोना म्हामारीचे संकश्ट पयस जावन पर्यटनान परतून उबारी घेतिल्ल्यान फाटल्या वर्सा सावन सनबर्न जावपाक सुरवात जाल्या. एक वर्सा राज्यांत सनबर्न आनी सुपरसॉनीक हे दोन महोत्सव जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
