भांगरभूंय | प्रतिनिधी
पयलींच्या आराखड्या प्रमाण शॅक उबारपाचे मुख्यमंत्र्याचे आदेश
पणजी, प्रतिनिधी ः दर्यादेगांचेर शॅक उबारपाच्या जाग्या विशीं घुस्पा गोंदळ आशिल्ल्यान अंदू सुध्दा शॅक उबारपाक डिसेंबर म्हयन्या मेरेन कळाव जातलो अशी स्थिती आसा. 2019 ते 2023 मेरेन जो डिमार्केशन आराखडो आसलो ते प्रमाण शॅक उबारपाचे आदेश मुख्यमंत्री डॉ. प्रमोद सावंत हांणे दिले. हे विशीं शॅक धनी, आमदार मायकल लोबो आनी मुख्यमंत्री सावंत हांची आयज बसका जाली.
नोव्हेंबर अर्दो सोंपिल्ल्यान पर्यटन हंगाम आतां सुरू जाला. राज्यांत देशी तशेंच विदेशी पर्यटक येवपाक सुरवात जाल्या. पर्यटन हंगाम सुरू जालो आसलो तरी शॅक उबे रावपाक दर वर्सा प्रमाण डिसेंबर म्हयन्या मेरेन कळाव जातलो.
शॅक धनयांचे सगळे प्रस्न सुटावे जाल्या. पयलींच्या आराखड्या प्रमाण शॅक घालपाक मेकळीक दिल्या, अशें डॉ. सावंत हांणी सांगलें. शॅक धोरणाक मान्यताय दिवन पर्यटन खात्यान लॉटरी पद्दतीन शॅकांचे वाटप केलां आसले तरी जाग्या विशीं कोफुंसाव आशिल्लें. हाका लागून शॅक धनयांनी आयज सकाळीं मुख्यमंत्र्यांची भेट घेतली. हे वेळार आमदार लोबो हाजीर आशिल्लें. दर्यादेगांचेर आतां रोखडींच शॅकां उबीं रावतलीं, अशें तांणी सांगलें.
नव्या आराखड्यांत पारंपरीक नुस्तेमार जे जाग्याचेर व्हडीं नांगरतात, त्योच सुवाती शॅक घालपा खातीर निश्चित केल्ल्यो. हाका लागून शॅक धनयां मदीं निरशेवणी आसली. पयलींच्याच आराखड्या प्रमाण शॅका घालपाची मेकळीक आतां दिल्या. हाचे फुडें शॅक धनी कंसेन्ट टु इस्टाब्लिश परवानो घेतले. ताचे उपरांत कन्सेन्ट टु ऑपरेट परवानो घेवचो पडटलो. हाका लागून डिसेंबरा पयलीं शॅकां उबीं रावप कठीण आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
