भांगरभूंय | प्रतिनिधी
भांगरभूंय । प्रतिनिधी
पणजीः रिव्होल्सुशनरी गोवन्स (आरजी) पक्ष पांवड्यार पंचायत वेंचणूक लडोवचो ना तरी बऱ्या आनी सुशिक्षीत गोंयकार तरणाट्या उमेदवारांक आमचो तेंको आसतलो. जांकां आमचो तेंको जाय तांणी पक्षा कडेन संपर्क सादचो अशें आवाहन पक्षाचो अध्यक्ष मनोज परब हांणी मंगळारा एके पत्रकार परिशदेंत केलां.
गोंयच्या गांवगिऱ्या वाठारांत सध्या परप्रांतीय लोक पावल्यात. आमकां आमचें ग्रामीण गोंय सांबाळून दवोरपाक जाय. आधुनीक गांव हें आरजीचें ध्येय आसा. ते प्रत्यक्षांत हाडपा खातीर बऱ्या उमेदवारांची पक्षाक गरज आसा आनी तांकां आमचो तेंको आसतलो. कांय उमेदवारांनी आमचे कडेन तेक्याची मागणी केल्या. आमचे कांय वावुरपी हे वेंचणुकेक उबे रावतले. पंचायत वाठाराची उदरगत करपा खातीर सुक्षिक्षीत तरणाट्यांनी पंचायत वेंचणूक लडोवपाचें आवाहन मनोज परब हांणी केलां.
पंचायत वेंचणूक पक्ष पांवड्यार जरी लडयनात तरी भाजपाचे सगळे मंत्री आनी आमदाराक आपल्या उमेदवारांक वेंचून हाडपा खातीर सक्रिय जाल्यात. गोंयकारांनी भाजपाच्या आश्वासनांक बळी पडचें न्हय. गोंयच्या हिता खातीर बऱ्या उमेदवारांची गरज आसा. आमी तांच्या फाटल्यान उबे रावतले अशें मनोज परब हांणी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
