सिंधू, सायना, प्रणय क्वॉर्टरफायनलींत

भांगरभूंय | प्रतिनिधी

दोन खेपेची ऑलिम्पीक पदक जैतिवंत पी व्ही सिंधू, सायना नेहवाल आनी फॉर्मांत आशिल्लो एच एस प्रणय हांणी सिंगापूर ओपन सुपर 500 बॅडमिंटन सर्तीचे क्वॉर्टरफायनलींत सुवात मेळयली.

तिसऱ्या सिडा वयले सिंधून संवसारीक क्रमवारींत 59वे सुवातेर आशिल्ले व्हिएतनामाचे लीन एंगुयेन हिका 19-21, 21-19 आनी 21-18 अशा तीन गेमींनी हारयली. सिंधू फुडले मॅचींत चीनाचे हान यी हिच्या आड खेळटली.

तशेंच सायना नेहवालान संवसारीक क्रमवारींत णववे सुवातेर आशिल्ले चीनी खेळगडी बिंग जिआओ हिका हारोवन क्वॉर्टरफायनलींतली आपली सुवात निश्चीत केली.

नेहवालान पयली गेम 21-19 फरकान जिखली. पूण, दुसरे गेमींत ती 11-21 अशा फरकान फाटीं पडली. पूण, नेहवालान आपली एकाग्रताय कायम राखतना तिसरी गेम 21-17 फरकान जिखून फुडले फेरयेंत सुवात मेळयली.

नेहवाल सुमार 15 म्हयन्यांनी खंयचेय सर्तीचे क्वॉर्टरफायनलींत सुवात मेळयली.

मजगतीं, संवसारीक क्रमवारींत 19वे सुवातेर आशिल्ल्या प्रणयान संवसारीक क्रमवारींत चवथे सुवातेर आशिल्ल्या चीनी तायपेच्या चोउ तियेन चेन हाच्या आड पांच सप्तकां भितर दुसरे खेपे हारयलो. एक वर आनी णव मिनटां मेरेन चलिल्ले मॅचींत 14-21, 22-20 आनी 21-18 अशा तीन गेमींनी हारयलो. प्रणय आतां जपानाच्या कोडाई नाराओका आड खेळटलो.

भारताचो आनीक एक खेळगडो किदम्बी श्रीकांताक हारोवपी मिथुन मंजुनाथ हो आयर्लेण्डाच्या एन एंगुयेना आड 10-21, 21-18 आनी 16-21 अशा फरकांनी हारलो