भांगरभूंय | प्रतिनिधी
आर्टिफिशल इंटेलिजन्साच्या तेंपार मनीसबळाचे बुद्धीचीय कसवटी आसता. वेबसायट, विकीपिडीया, विकीमिडीयार सगळें मेळळें तरी तें चूक, बराबर कळपाक शिकचें पडटा.
देसांत अंदूं माॅन्सून बेगीन येवपाचो अदमास भारतीय हवामान खात्यान उक्तायला. पावसाचीं कुपां गोंयच्या मळबांतय दिसतात, भोंवतण बदलता. केरळांत माॅन्सून पावतना एकादरे भारत- पाकिस्तान झुजाच्या कुपांची दाटी वाडिल्ली, उणी जाल्ली दिसतली. झुजांत जैत आनी हार आसतलीच, कोण जिखलो, जिखतलो, कोण जैता पसून पयसावलो, पयसावतलो ह्यो खबरो, काणयो येत रावतल्यो. झुजांत मनीसबळ, तंत्रज्ञान, साधनसुविधाचें लुकसाण जाता तें भरुन येवप सोंपें न्ही. झुजा खातीर झुजसामग्रीची बांदावळ करचे पासत वर्सानवर्सां सरकार तयारी करता, ताची परिक्षा झुजा वेळार आसता.
आमचो भारत देस ब्रिटिशां कडेन झुजून स्वतंत्र जालो. संविधानाचो अमृतोत्सव सुरु जातना देसाक भारत पाक २०२५ झुजाचो अदमास आयिल्लो व्हय? पहलगाम आकांतवादाक जाप दिवपा पासत सुरु जाल्ली लडाय सोंपतकीच प्रस्नाची जाप मेळटली. भोवमाध्यमी पत्रकारितेचे कसवटेचो न्हय, झुजाचो हो तेंप. गोंयचें कोंकणी दिसाळें ‘भांगरभूंय’ झुजाच्यो खबरो भोव माध्यमांतल्यान समेस्तां मेरेन पावपाक उणे पडिल्लें दिसना. राजभास कोंकणीची ती देण. आमी सगल्यांनी कोंकणी दिसाळ्याक तेंको दिवन आमचे परीन खंय कितें जाता तें कळोवपाची गरज आसा. तें कळयतना वळख, खबर खंयच्यान मेळटा (सोर्स आॅफ द न्यूज) संपादप्यांक सांगप बरें.
आर्टिफिशल इंटेलिजन्साच्या तेंपार मनीसबळाचे बुद्धिचीय कसवटी आसता. वेबसायट, विकीपिडीया, विकीमिडीयार सगळें मेळ्ळें तरी तें चूक, बराबर कळपाक शिकचें पडटा.
झुजाक आरंब जातना तें कितले म्हयने, वर्स उरतलें कळप शक्य नासता. आरंबाक एक अण्वस्त्र सोडटात, उपरांत धा, शंभर सुट्टलीं. भारतांतल्या २८ राज्यांतले म्हत्वाचे उदका सांठे आशिल्ल्यो न्हंयो, धरणां एका धपक्यान मातये भरवण करपाक पाकिस्तान सोदता व्हय? जशे आकांतवादी तशे दर्यांतल्यान, मळबांतल्यान ब्रह्मास्त्रां येवंक शकतात. ब्रह्मास्त्रां, अण्वस्त्रां कशीं येतलीं? वेरेंच्या नौदळ म्हाविद्यालया वांगडा मांडवींत जें कितें उबें आसा, ताका तीं मारक थारूं शकतात. मुखेल पायपलायनी क्षेपणास्त्रांची लक्ष्य जातल्यो हाची जाणवीकाय सरकाराक आसा. झुजाची म्हायती दिवपी, घेवपी “वाॅर रुम” दिसाळ्यांनीय आसचे पडटलो, सरकारान ते विशीं कळोवपाक रावपाची गरज ना.
झुज म्हणल्यार कितें? हाची म्हायती तांकां आसपाक जाय. लाखांनी मनीसबळाबराबर कोट्ट्यांनी रुपयांचीं अण्वस्त्रां भारताकडेन आसचीं हेखातीर गोंयचे आदले मुख्यमंत्री, संरक्षणमंत्री मनोहर पर्रीकार हांणी बुन्यादीचो वावर केलो. संरक्षणमंत्री पदार थोडोच तेंप रावनय तांणी धोरणां, नेमावळी बदल्ल्यो. ‘एक मनोहर कथा’ हें मंगला खाडीलकर हांचें पुस्तक वाचल्यार ते विशीं म्हायती मेळटा. झुजाची येवजण, सर्जरी, बाॅम्ब उडोवप, अण्वस्त्रां सोडप हे खातीर तंत्रगिन्यान आपणावप, तंत्रगिन्यानान जोडिल्लो वाॅर रुम उबारप जितलो म्हत्वाचो तितलेंच अचूक म्हायती घेवप, दिवप, पावोवप म्हत्वाचें. वाॅर रुमाक बुराक आसचे नात, म्हायती व्हावंची ना म्हणून जतनाय घेवची पडटा. गिन्यानी, अणभवीं कडल्यान मार्गदर्शन घेवचें पडटा. घेतिल्लो निर्णय चालीक लागचे पयलीं वावड्यो उडोवच्यो न्हय, बोवाळ नाका म्हणून उरी सर्जिकल स्ट्रायका वेळार कितल्या लोकांक विश्वासांत घेतलें तें आदल्या संरक्षण मंत्र्यांनी मुलाखतींत सांगलां. विश्वास जोडटल्यांक पुराय म्हायती मेळ्ळ्यारय ती तशीच भायर फोडचेना, मीठ मसालो नाका म्हणून आदीं सांगचें पडटा हें तांच्या उतरांतल्यान शिकचें.
आॅपरेशन सिंदुर सुरु जालां तश्यो ल्हान- व्हड घडणुको पंधरा दीस जातल्यो. अमेरिके वरी व्हडा राष्ट्राच्या मुखेल्यांनी भारताक तेंको दितना सादूर रावपाचो, शांतीकायेचो, थिरायेचो उलो मारला. भारता कडेन झुजांबोटी, झुजांविमानां, झुजांशस्त्रां करपाचें गिन्यान, तंत्रगिन्यान आसा. आकाश, धनुष, तेजसाची तांक दिसता. ए आय, ड्रोन तंत्रगिन्यानान पलतडीं कितें घडटा तें एकामेकांक कळटा.
रशियांतलें झुज पळेल्यार भारत- पाकिस्तानाचे व्हड झुज तशेंच पेट्टलें वा ना हाचो अदमास पावसांत येतलो. भारत- पाकिस्तान कारगील झुज मे- जुलयाच्या तीन म्हयन्यांनी जाल्लें, भारत जिखिल्लो. कांय झुजां नोव्हेंबर, डिसेंबर म्हयन्यात जाल्लीं. झुजांच्या फाटल्या इतिहासाचेर नदर मारल्यार भारत- पाकिस्तान झुजाचे साक्षीदार तीनय दळांनी आसात तें होल्मतलें. कालच्या आनी आयच्या झुजा मदीं वेगळेपण आयलां तें विज्ञान, कम्युनिकेशन, तंत्रगिन्यानाचे उदरगतीन.
उदरगतीचे पावंडे मारतना फकत काँक्रिटाचीं रानां न्हय, मनीसबळय घडोवचें पडटा हींय उतरां आदल्या संरक्षणमंत्र्याचीं. ते पासत ताणीं पावलां मारलीं. डिफेन्स एक्सपो, म्हाविद्यालयां, अस्तुरेचो लश्करांत आसपाव, एअरो शो, विमानतळ, बोटी बांदपांतल्यान फाटलीं धा वर्सां भारत झुजपाक उणो पडचोना हें देसाक खबर आसा. गरज आसा डिफेन्सातली महासत्ता हेर राश्ट्रांक कारवायेंतल्यान दाखोवपाची. सांगाती, दुस्मान आसतलेच, तेय आपसूक सांपडटले.
माॅक ड्रील्स (झुज चड तेंप उरल्यार समेस्तांनी कशी जतनाय घेवची तें सांगपी येसाय) देसांतल्या साबार राज्यांनी जालीं.
गोंयांत भारतीय लश्कराचीं, संरक्षण मंत्रालयांची आस्थापनां लागीं लागीं सगल्या तालुक्यांनी आसात. न्हंयो आनी दोंगुल्ल्यो, दर्यादेगो, मुरगांव बंदर, संशोधन केंद्रांचें वाठारांनी जावपी येसायो, बसका झुजा तेंपार टार्गेट जावपी म्हत्वाच्यो संस्था, आस्थापनां, पायपलायनी सांबाळपा पासत आसूंये. पावसा आदीं उदका थेंब्याक म्हत्व येता तशेंच झुजा तेंपारय. उदक, बिजलेचो उपेग जतनायेन करचो, झुज जाल्यार म्हारगाय पेट्टली म्हणून वस्तींची साठवण व्हडा प्रमाणात करची न्हय अशो सुचोवण्यो दिवपाची गरज आसा.
झुज काळखांत पेट्टा, उजवाडांत झुजनिती शिजता, उजोय पेटूंक येता. ब्लॅक आवट जाल्यार तो सांजवेळा उसरां, रातचो तेन्ना घरांत दिवे बारीक आसचे, मेणवाती, बॅटरी दिवे उपेगी. मोबायलाची बॅटरी आसाच. येरादारीय रातची उणी जातली, कसिनोचे दिवे रातचे पालवल्ले आसचे ही शिटकावणी दिवपाची गरज आसा. पहलगामाच्या उपरांत गोंयांत जमो करुन गाड्यो, बशींनी येवपी पर्यटक आसात. तीं थळां पुलीस बंदोबस्तांत दवरचीं, कसिनो रेग्युलेरिटी आॅथोरिटीची बांदावळ करची. उंचेल्यो बिल्डिंगो विमानाच्या मुखेल टार्गेटांत येतात, न्यूयाॅर्क टाॅवर्साची घडणूक याद करुया, सादूर रावया. जतनाय जायच, आमचे कडल्यानय.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
