भांगरभूंय | प्रतिनिधी
पत्रभूंय
डाॅ. प्रमोद सावंत
मुख्यमंत्री, गोंय
नमस्कार,
तंत्रगिन्यानाच्या बदलांतल्यान आर्टिफिशल इंटेलिजन्स भारतांतय येता ताची जाणवीकाय तुमकां जाल्या. तुमी गोंयांत म्हत्वाचे शिक्षणीक बदल घडोवन हाडपाक फुडें सल्ल्यात. तेआदीं अभ्यासय जाला हें तुमच्या उलोवपांतल्यान होलमता. राज्यांत स्थलांतरांतल्यान कितले टक्के? कोण आयल्यात? धनिक, गरीब कितले? हें तुमकां कळ्ळां. समाजीक बदलांची बारीकसाण तुमी घेतात तातूंतल्यान कुशळटाय अभ्यासक्रमा कडेन विद्यार्थ्यांनी वच्चें हें सांगतात.
लागीं- लागीं 12 -13 वर्सांनी आय टी आय अभ्यासक्रमाक 10 वे च्या पावंड्यार हाडपाक जैत मेळपाक लागलां. परंपरेतल्या आर्टस, काॅमर्स, सायन्स अभ्यासक्रमापरस तंत्रिक शिक्षण अभ्यासक्रमांक म्हत्व आसा तें पालकांक कळूंक लागलां. शिक्षणात सर्त आसता, ते सर्तींतल्यान अती कुशळ, कुशळ, अकुशळ विद्यार्थी कळटात. कुशळ, अकुशळ विद्यार्थी प्रशिक्षणांतल्यान अतीकुशळ जातले अशें न्हय पूण अणभव, जोड शिक्षणातल्यान कुशळटाय
वाडटली हें सत.
आपल्याक जें मेळूंक ना तें भुरग्याक मेळचें हे खातीर पालकांचे येत्न आसतात. हाताची पांचय बोटां एक सारकीं नासतात, ते प्रमाण घरांतलीं दोन भुरगीं एकसारकीं आसनात, शिकनात. एकलें अती हुशार जाल्यार दुसरें कुशळ, तिसरें ढ अशेंय आसूंक येता. ते नदरेंतल्यान तुमी कुशळटायेच्या शिक्षणा कडेन पळोवचें. गोंयचे सुमार 100 – 150 अतीकुशळ विद्यार्थी गोंयां भायर दरवर्सा शिकपाक वतात. उंचेल्या समाजा वांगडा हेर समाजांतले एक- दोन विद्यार्थीय तातूंत आसपावतात. 200 – 300 अती कुशळ, कुशळ अभियंते गोंय वर्साक घडयता. अतीकुशळांक खासगी कंपनीं उखलतात, बऱ्यो नोकऱ्यो तांकां मेळटात, कुशळांकय संद मेळटा. सरकारी नोकरेचेर सगल्यांचो दोळो आसता. सरकारांत येवपी अतीकुशळ नासतात, शिक्षणातली अतीकुशळटाय ना जायत चलल्या ? जोखात.
अतीकुशळ शिक्षण मळापरस उद्येगांत वचून करिअर घडयतात. शिक्षणाची अचूक अवस्था कितें आसा? गोंय विद्यापीठ बदलां कडेन थळावेंपणातल्यान पळयता? अभ्यास जावचो. कुशळटाय अभ्यासक्रम विद्यापीठ गोंयांत येवचें. तंत्रनिकेतन अभ्यासक्रमात बदल जावचे, पदवी उपरांत नवे अभ्यासक्रम जाय.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
