भांगरभूंय | प्रतिनिधी
भांगरभूंय प्रतिनिधी
मडगांव: वीज बिल सवलत घोटाळो प्रकरणांत मुखेल दुबावीत माविन गुदिन्हो हांणी ह्या प्रकरणाची पुलीस डायरी न्यायालयांत सादर करपा खातीर अर्ज केल्लो. ताचेर सरकारी वकीलान आपली बाजू मांडली ना म्हणून सुनावणी 12 जुलय मेरेन तहकूब केल्या.
दक्षीण गोंयचे अतिरिक्त सत्र न्यायाधीश व्हिन्सेंट डिसिल्व्हा हांचे मुखार शेनवारा हें प्रकरण सुनावणेक आयलें तेन्ना सरकारी वकील दुयेंत आशिल्ल्यान आपली बाजू मांडपाक शकले नात अशें तांच्या सहकारी सरकारी वकीलान न्यायालयाक सांगले उपरांत न्यायाधीश डिसिल्व्हा हांणी सुनावणी मुखार धुकल्ली.
4.52 कोटी रुपयांच्या ह्या घोटाळो प्रकरणाची पुलिसांनी एकदां चवकशी करून परत दुसरे फावटीं चवकशी केली असो दावो पंचायत मंत्री माविन गुदिन्हो हांणी केलो. एकदां चवकशी केले उपरांत परत तपास करपाक मेळना हो तांत्रीक मुद्दो उपस्थित करून आपले वयलो खटलो रद्द करचो अशी मागणी केल्ली. आपलें म्हणणें सिद्ध करपा खातीर पुलीस डायरी न्यायालयांत हजर करची अशी मागणी केल्ली.
ह्या प्रकरणांत आदले वीज अभियंते टी. नागराजन तशेंच सवलत जाका दिली ते मुरगांव स्टिलाचे आर. के. राधाकृष्णन आनी व्ही. एस. भांडारी आनी बिनानी झिंकाचे व्ही. कृष्णकुमार हे दुबावीत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
