विदेशांतल्यान भारतांत ‘रिमिटन्स मनी’ येवपी गोंय देशांत 15 वे सुवातेर

भांगरभूंय | प्रतिनिधी

-2021त धाडले 8.9 काेटी डॉलरः आरबीआयचो अहवाल

भांगरभूंय पिनाक कल्लोळी

पणजी : विदेशांत स्थायीक जाल्ले एनआरआय वा नोकरी आनी हेर कामां खातीर थंय गेल्ल्या नागरिकां कडल्यान भारतांत पयशे धाडपाचे क्रमवारींत गोंय देशांत 15वे सुवातेर आसा. आरबीआयच्या अहवाला प्रमाण 2021 त विदेशांतल्यान गोंयांत 8.9 कोटी डॉलर गोंयांत धाडले. भारतांत धाडिल्ल्या वट्ट रकमेचे तुळेंत हें प्रमाण 1.1 टक्के इतले आसा. ह्या प्रमाणांत 2016- 17 चे तुळेंत मात्शी वाड जाल्या.

रिझर्व्ह बँक ऑफ इंडिया (आरबीआय) तशेंच जागतीक बँकेच्या अहवालांतल्यान ही म्हायती मुखार आयल्या. हे क्रमवारीत महाराष्ट्र पयल्या क्रमांकाचेर आसा. विदेशांतल्यान भारतांत धाडपी ह्या पयशांक ‘रिमिटन्स मनी’ अशें म्हणटात. आरबीआयच्या अहवाला प्रमाण, 2021 त देशांत वट्ट 89 हजार 127 दशलक्ष यूएस डॉलर्स इतले रिमिटंस पयशे आयल्यात.

हेर राज्यांचे तुळेंत गोंय लोकसंख्येच्या आनी क्षेत्रफळाचे नदरेन ल्हान राज्य आसले तरी हें क्रमवारीत गोंयाक सुवात मेळप ही व्हड गजाल आसा. फाटल्या कांय वर्सांनी जायत्या गोंयकारांनी भारताचे नागरिकत्व सोडून विदेशांत रावप पसंत केलां. तशेंच नोकरी निमतान जायते आनी नागरीक विदेशांत काम करतात. तातूंतले जायते जाण बोटींचेर काम करतात.

भायल्या देशांतल्यान भारतांत बँक वा मनी ट्रान्सफर कंपनी वरवीं पयशे धाडटात. आरबीआय ह्या सगल्या वेव्हारांचेर नदर दवरून आसता. 2021 त बँके परस मनी ट्रान्स्फर वरवीं चड पयशे धाडल्यात. हे पद्दतीन पयशे धाडपाचे टक्केवारींत पंजाब (28 टक्के) आघाडेर आसा. ते उपरांत

महाराष्ट्र आनी उत्तर प्रदेशाचो क्रमांक लागता. हे क्रमवारीत गोंय 15 वे सुवातेर आसा. 2016-17 हेंच प्रमाण मात्शें चड आशिल्ल्याचे अहवालांत नमूद केलांं.

फाटल्या कांय वर्सांनी भारतांत येवपी ‘रिमिटन्स मनी’ चे प्रमाण वाडत आसा. सध्या जगांत सगल्यांत चड ‘रिमिटन्स मनी’ भारतातूंतच धाडटात. भारता उपरांत चीन, मेक्सीको, फिलिपायन्स, नायजेरिया ह्या देशांचो क्रमांक लागता. भारताक सगल्यांत चड पयशे यूएसएतल्यांन धाडटात. ते उपरांत यूएई, युके, सिंगापूर, सौदी अरेबिया, कुवेत, ओमान, कतार ह्या देशांतल्यान भारतांत पयशे धाडटात.

2022 त भारतांत ‘रिमिटन्स’ वरवीं 111 अब्ज यूएस डॉलर्स धाडिल्ले.